February ni 1, 2021 ah Myanmar mipui sawrkar chu sipai ten an thuneihna hmangin an paihthla a. Hetia ram a buai takah chuan mi tam tak sahimna zawngin Mizoramah an rawn raltlan a. Chutiang deuh bawkin kan thenawm Manipur state-ah Meitei leh Kuki-Zo inkarah inhriat thiamlohna thlengin zo hnahthlak mi thahnem tak chu Mizoramah an rawn tlanchhe bawk a. Hei mai ni lovin Bangladesh lamah pawh politics thila inhriat thiamlohna thleng vangin kan unau mi engemaw zat chu Mizoram lamah an rawn tlanchhe bawk a ni.

Heng kan unau harsatna tawk te hi Mizo mipui ten theih ang angin kan lo tuam hlawm a. Sawrkar mai ni lo kohhran, tlawmngai pawl, zirlai leh mipui ten chhawmdawl hna thawkin an ei leh in tur bakah chenna leh thawmhnaw tur thlengin kan lo ngaihtuah sak a. Hmun thenkhatah phei chuan 'welcome banner' nen hial kan lo hmuak a ni. Hei hian a entir chu kan unaute hi kan lainat a, kan hmangaih a ni tih hi a ni.

Hetih karah hian zawi zawiin buaina pawhin reh lam a pan chho ve zel a. Myanmar lamah pawh mipui lam tang pawl hrang hrangte chu chak chho zelin sipai kut atangin ram zau tak an la let a, an thu hnuaiah an dah ta zel bawk. Chutiang zelin Manipur lamah pawh boruak ralmuang zelin mi tam tak chu an kir a, boruak hi a ralmuan chhoh zel pawh beisei a ni.

Mahse hetih laia thil vanduaithlak tak mai lo thleng ta chu unau inkara inhriat thiamlohna leh indona hial lo chhuak ta hi a ni. Kan hriat angin kan unaute hian do thu hmun an neih lai chuan an tangrual a, tunah boruak tlemin an dai deuh tihah anmahni leh anmahni an indo ta hial mai hi a pawiin a zahthlak tak zet a ni.

Manipur lamah nise hnam bil angin thil kalpui a ni a. Zep nak emaw ralthuam an chelek deuh thaw hial mai a, an buaina a lawm ber tur chu an hmelma nia an ngaih Meitei an ni ngei ang. Myanmar lamah lah nise zo hnahthlak theuh theuh pawh an inkap hial a, hei hian sipai sawrkar chu a ti lawm khawpin a rinawm. Engatinge kan unau zo hnathlakte hi Mizoram an awm chhung leh harsatna an tawh chhung chauha an inrem le? Do thu hmun an neih lai chauha tangrual theih chauh an ni tihna em ni?

Kan unaute hi an inhmuh chhuah a, an in siamtha lo zel anih chuan hnam dangin an hneh zel dawn tihna a ni a. Zo hnathlakte hi hmun khatah awm khawm vek pawh ni ila hnam dang ngaihtuah chuan kan la tlem teh reng nen hian hetia kan la indo zui hi chu a pawi tak zet a ni. Zo hnathlak unaute hian tuna an harsatna tawh hi a tha zawnga in siamthat nan an hmang lo anih chuan a tuartu tur chu anmahni bawk an ni leh dawn a ni.