Mizoramah khua a thal chho tan a, khua a ro avangin hmun hrang hrangah ram kang a awm chho tan niin a lang a. Ramkang hi a pawi a, chuvangin a ven kawngah tan lak a pawimawh hle.

Mizoramah chuan kumtin March leh April hi dan tlangpuiin kangmei a chhuah tam hunlai a ni a. Dan naranin November velah ruahtui a hul a, May thla velah a tla leh tan thin a. Hemi inkar khawro chhoh lai tak March leh April velah hian ram kang leh in kang sawi tur a tam thin hle. 

Kangmei chhuah chhan ber hi chu fimkhur loh vang a ni. In kang tam ber pawh hi fimkhur loh vanga kang niin a lang a. Kan meichhem kan tihmit that loh vang te, bati chhit kalsan mai mai vang te, ar inah electric kan chhit atang te leh electric short kan tih mai vang te hi a ni ber a. Chutiang zelin ram kan chhan ber pawh tute emaw ramvak in mei an tihmit that loh vang te, meibung paih mai mai vang te a ni.

Kangmei a ngeiawm em em na chu in kang ah te hian engmah hnutchhiah nei lovin a kang fai leng mai a. Thli leh leimin ang ah te chuan eng eng emaw khawm leh tur te a awm a, in kangah erawh chuan kan thawmhnaw, mutbu, sum leh document te a kangfai vek mai a, hei hi a ngeiawm lehzulana a ni.

Chutiang zelin ramkang te hi a pawi em em mai a. Ram a tibua a, chumai ni lovin boruak tha min petu Oxygen siamchhuaktu hnim hring a kang chhia a. Ramngaw atanga chaw leh nunna nei sava leh ramsa te an chereu phah lehzel a ni. Kuminah hian ram kang a tlem zawk nan a hun takah lo pawh hal ila, lo hal dawnah meikawng tha takin sial bawk ila kangmei chhuak tur tam tak hi kan veng thei ang.

Mizoram hian ramngaw a la nei tha a, hei vang hian sik leh sa pawh a la nuam hle a ni. Kan sik leh sa nuam tak mai bakah kan rama nungcha leh kan humhalh zel theihnan kangmei laka kan ram venhim hi mitin mawhphurhna a ni tih hriaa ram tikang lo tura tan lak hi kan tih tur a ni tih kan hriat thar leh a ngai hle a ni.