India ram hi khawvela democracy (inthlang ram) lian ber kan ni a, mipui ten kan aiawha roreltu tur kan thlang thin. A changin India rama roreltu tur kan thlang a, state a roreltu tur thlan chang kan nei bawk a. Chutiang zelin khawpui leh tualchhunga roreltu tur kan thlang thin. Mipui ten kan aiawha roreltu tur kan thlang a, kan duh loh kan paih bawk a. Hetia mipui tam berin kan duh te ngeiin ro an rel thin hi a democracy bulpui tak chu a ni awm e. 

Kan thenawm Myanmar leh comunist ramah te chuan inthlanna fel a awm thin loh avangin mipui duh dan ni lovin tute emaw thlan ngei ngei a ngaih avang te, chung mite chu an thlan loh chuan an nunna thlenga hlauhawm anih thin avangin loh theih lohin an duh loh pawh nise an thlan a ngai thin a. India ramah erawh mipui ten kan chhia leh tha hriatna thiang tak hmanga kan aiawh tur kan thlang thin hi a ropui bik hle.

Kan hma lawkah Aizawl khawpui enkawltu tur Corporator kan thlang leh dawn a, party hrang hrangte pawh an tang hle. Aizawl khawpui hi kan hriat angin ruahmanna felfai awm lova khawpui thang chak tak a ni a, chuvangin kawng tam takin enkawl kawngah harsatna a awm thin. Insak a ni emaw lei laih leh thildang eng emaw zatah tun hma lamin duh duha lo tih thin a ni a, AMC a din hnuah mumal zawka kalpui chhoh a niin hei hian awmzia a nei chho mek zel. Mipuite pawhin kan khawpui thatna tur ani tih hria a, thuawih pawh kan zir chhoh zel a pawimawh.

Inthlan dawn reng rengin party hrang hrang ten thlan tlin an nih huna an tih tur pawimawhte an puang thin a, chung chu an ti hlawhtling em tih hi mipui ten kan enna tur a ni. AMC Corporator inthlan turah pawh hian mipui ten khawi party nge Aizawl enkawl tur hian tha ber ang? Kan ward tan hian tu nge hna thawk thei ber ang tih uluk taka ngaihtuah chunga vote kan thlak a pawimawh hle. 

Mahni party anih vang ngawt emaw, chhungkhat laina hnai anih vang ngawt emawa thlang kan nih chuan a tuartu tur chu keimahni bawk kan ni dawn. Kum nga chhunga kan aiawhtu tur hi kan thlan fuh chuan a hlawkna teltu tur chu keimahni kan ni dawn a, kan thlan sual erawh chuan a tuartu tur chu keimahni mai bakah Aizawl khawpui hi a ni dawn a ni tih hre chunga vote thlak a pawimawh hle.

Party hrang hrang ten camapign an ngawrhin candidate te pawhin thahnem an ngai hle a. Hetih lai hian tan luat vangin mahni khiangpuite dawt leh thu dik lo hmanga inbeih leh inchirhtheh awm thei a ni. Chuvangin political party hrang hrang leh candidate te pawh mi dang hliam zawng leh rilru ti na lo zawngin campaign zel thei se a duhawm hle.