Meth, poppy chi leh kuhva thahnem tak man

Aizawl: Directorate of Revenue Intelligence (DRI) Silchar leh Assam Rifles tangkawpte chuan July ni 29 khan Vairengte-ah poppy chi leh kuhva thahnem tak an man a. July ni 30 khan Aizawl bul Muallungthu-ah Police leh AR tangkawp chuan methamphetamines Kg 3.615-a rit an man bawk.

  July ni 30 khan Muallungthuah lirthei pakhat rinhlelh sa ti dingin methamphetamines leh a neitu nia puh mi pahnih nen man an ni a, Rs Vbc 10.845 hu nia chhut a ni a. Mi mante hi court lama hruai an ni.

  DRI leh AR tangkawp te chuan poppy chi ip 275 manin Rs vbc 2.19 hu a ni a. Kuhva ro 389 bag an man hi Rs vbc 1.91 nia chhut a ni thung a ni. Heng thil mante hi godown pahnih atanga man an ni a, thil mante hi DRI Silchar kutah hlan an ni.

MIGAHTA ten lungawi lohna lantir titawp

Aizawl : Mizoram Govt. Adhoc Aided High School Teachers' Association (MIGAHTA) ten ni 8 chhung lungawi lohna an lantir hnuah July 30, 2026 khan an titawp.

  MIGAHTA chuan thuchhuah siamin July 30, 2026 chhun khan protest programme chu an titawp lailawk a, ZPM PAC meeting thutlukna leh Department hmalakna an ngaihchan thu sawiin August 3, 2026 atangin member-te chu mahni school theuhah an hna chhunzawm leh turin an hriattir.

  MIGAHTA hian Resolution pali an pass a ni a, ZPM PAC meeting thu an ngaichang a, inbiakna palzut a nih chuan na zawka lungawi lohna lantir an tum. 

CCM-in FCRA Amendment Bill 2026 duh lohna lantir nan kawngzawh tum

Aizawl : Council of Churches in Mizoram (CCM) hruaitute chuan FCRA Amendment Bill Parliament Monsoon Session-a ngaihtuah chhunzawm tum a nih avangin hemi duh lohna lantir nan August 11, 2026 hian Aizawl-ah kawngzawh huaihawt an tum thu July 30, 2026 khan an puang.

  Kawngzawh an huaihawt tum hi an ruahmanna ang chuan hmun hnih atanga zawh tur a ni a, zing dar 10:30 atangin Zarkawt leh Sikulpuikawn atanga zawh tan tum a ni a, Vanapa Hall kawtah intawhkhawm a, hun hman an tum a, hemi atana hian CCM member chauh ni lo, Kohhran hrang leh NGO te pawh sawm an tum thu an sawi a, he bill duh lo zawng zawngte pawh zawm ve turin an ngen bawk.

Mizoram SHRC hmasa ber Chairperson leh Member-te lalut

Aizawl : Mizoram Larsap General (Dr) Vijay Kumar Singh chuan July 29, 2026 khan Mizoram State Human Rights Commission (SHRC) hmasa ber Chairperson atan Justice Marli Vankung, Former Judge, Gauhati High Court leh Member atan Vanlalenmawia, MJS (Rtd.) leh K. Lal Nghinglova, IAS (Rtd.) te chu Durbar Hall, Lok Bhavan, Aizawlah rinawmna thu tiam tirin a la lut. 

  Lakluhna inkhawmah hian Chief Secretary Khilli Ram Meena chuan Larsap-in Mizoram State Human Rights Commission Chairperson leh Member-te a ruatna notification a chhiar chhuak hmasa a. Hemi hnu hian Larsap General (Dr) Vijay Kumar Singh chuan Justice Marli Vankung, Vanlalenmawia leh K. Lal Nghinglova te chu rinawmna thutiam chham tirin a lalut a ni.

Sports Minister-in Aizawl FC leh Chanmari FC te Bana Kaih atanga tanpuina pawisa fai hlan

Aizawl: Mizoram atanga Indian Football League khel club pahnih – Aizawl FC leh Chanmari FC – te season liamtaa an senso tanpuina chu July 29, 2026 khan Sports & Youth Services Department Minister Lalnghinglova Hmar chuan club pahnih hruaitute kutah a hlan.

  Indian Football League club pahnihte hi a vawikhat nan Mizoram sawrkar chuan Bana Kaih (Handholding) atangin Rs. 25 lakh (cheng nuai 25) ve ve in a tanpui a. April 16, 2026 khan 1st installment cheng nuai 17.5 hlan tawh niin, vawiinah Sports Minister hian 2nd installment cheng nuai 7.5 ve ve a hlan a ni.

Sipai bang leh Synod Hospital ten MoA ziak

Aizawl : Ex-Servicemen leh an chhungte tana Healthcare Scheme duan bik, Ex-Servicemen Contributory Health Scheme (ECHS) chuan sum chawi ngai lova (cashless) an inenkawl theih nan Synod Hospital, Durtlang nen July 28, 2026 khan Memorandum of Agreement (MoA) an ziak.

  Memorandum-ah hian ECHS member damlote chu Synod Hospital-ah sum chawi ngai lovin an inenkawl thei ang a. hospital-a inenkawl hun chhung pawh ECHS dan angin a tul dan anga pawhsei theih a ni.

  Ex-Servicemen te hian Synod Hospital hma hian Zoram Medical College & Hospital (ZMC&H) leh Mizoram State Cancer Institute (MSCI) te Memorandum of Agreement an lo ziahpui tawh bawk. 

MP (Lok Sabha) Richard Vanlalhmangaiha’n sawrkar laipui dawr

Aizawl: Member of Parliament (Lok Sabha) Richard Vanlalhmangaiha chuan July 30, 2026 khan Union Minister pahnih - Union Culture Minister Gajendra Singh Shekhawat leh Environment, Forest and Climate Change Minister of State (Independent charge) Kirti Vardhan Singh te a dawr.

  Union Culture Minister hnenah hian MP Richard Vanlalhmangaiha chuan Mizoramin Tagore Cultural Complex a neih theih nan hma lak sak turin a ngen a. Tagore Cultural Complex chu Mizoramin a neih ve ngei theih nan hma a lakpui tur thuin a lo chhang a ni.

  Kirti Vardhan Singh hnenah hian Dampa Tiger Reserve te leh hmun dang danga compensation lak tur la tangkhang te chu a nih dan tur ang taka lak a nih vat theih nan leh RFCTLARR Act. 2023 innghah nana hmang a, compensation te hi pek an nih ngei thei nan hma la turin a ngen a. Minister pawhin theihtawp a chhuahpui tur thu a hrilh a ni.

Agriculture Minister-in nihawi chi sem tur a vailiam

Aizawl: Directorate of Agriculture & Farmers’ Welfare Conference Hall-ah July 29, 2026 khan district 10 hnena nihawi chi sem tur vailiamna hun (flagging-off programme) leh favanga uar zawka nihawi ching tura campaign kick-off neih a ni a.  Agriculture & Farmers’ Welfare Dept. Minister P.C. Vanlalruata chuan khuallian niin he hun hi a hmanpui a, nihawi chi sem turte chu a vailiam.

  He programme hi Agriculture & Farmers’ Welfare Department Secretary Ramdinliani chuan a kaihruai a, Deputy Director (Crops) Vanlalngaii atang technical report ngaihthlak niin, Khawbung Block Champhai District Gram Sevak Lalramenga atang sawhthing leh nihawi chin kawp thatna chungchang ngaihthlak a ni a. Director Vanramthangi chuan he hun hi lawmthu sawiin a khar.

CM hovin SASCI hmanga hnathawhte review meeting nei

Aizawl : Chief Minister Lalduhoma chuan July 28, 2026 khan CM Conference Hall-ah SASCI 2025-26 hmanga hnathawh zawng zawng, Cyclone Remal 2024-25 Part I hna zawng zawng leh SASCI Reformed base Incentives 2026-27 hnuaia hnathawhte enpuina (review) meeting a nei. 

  SASCI Project thawktu Department sawm 10 te hnathawh tawh chin report te leh an hmabak la awmte sawipui an ni a. Hun tiam chhunga Utilization Certificate an thehluh theih dan tur te, Expenditure Sanction la peih fel lohte rang zawka bawhzui dan tur leh SASCI Fund thar lo kal leh turte a rang lama an lo kal theih nana inbuatsaihnate an sawiho a ni.

Aizawl Mayor-in an hnuaia registered Engineer te training hmanpui

Aizawl : Aizawl Municipal Corporation (AMC) hnuaia Registered Engineer-te tana buatsaih ni hnih chhung awh (July 28 leh 29, 2026) "Training on Safe Building Construction Practices" chu hawnna hun chu July 28, 2026 khan neih a ni a. He hun hi Aizawl Mayor H. Lalremtluanga chuan khuallian niin a hmanpui.

  He training hi Mizoram sawrkara Disaster Management & Rehabilitation (DM&R) Department te, Aizawl Municipal Corporation leh National Institute Technology (NIT), Mizoram te tangkawpin an buatsaih a ni.

  He training-ah hian Aizawl Municipal Corporation hnuaia Structural Engineer te, Engineer dang te, Architect te, Supervisor te leh Firm hrang hrang aiawh te an tel a ni.

Secretary-General for United Nation Disaster Risk Reduction kawm 

Aizawl: Disaster Management & Rehabilitation Minister Prof. Lalnilawma chuan United Nations Secretary-General (SRSG) for Disaster Risk Reduction (UNDRR) Special Representative Kamal Kishore chu July 27, 2026 khan New Delhi Mizoram House-ah a kawm a. Technical thila thawhhona tha zawk an neih theih dan tur an sawi dun a ni.

  Minister chuan khuarel chhiatna hrang hrang - lirnghing, leimin, lung tla, sik leh sa inthlak danglamin a nghawng chhiatna dang te laka Mizoramin harsatna a tawh theih dan a sawipui a. Heng chhiatna lo thleng thut thei laka Mizoram mipuite an inven theih nan khawpui ruahmanna tha zawk siam leh insak dan chungchangah pawh tunlai thiamna hmanga building sak dan tur kaihhruaina tha zawk siam chungchanga Mizoram hmalakna te; Aizawl khawpui tawt lutuk chungchang leh Thenzawl Peace City atana ruahmanna an siam dan te a sawi bawk a ni.

Thawktu Pawl hrang hrang te Mizoram chhunga hmasawnna hluantling leh hlo neih dan tur a sawipui

Aizawl : Thawhtanni khan Disaster Management & Rehabilitation Minister Prof. Lalnilawma hovin khawvel hmasawn nana thawktu pawl lian tak tak te nen inkawmhona New Delhi Mizoram House ah an nei a. Mizoramin ei leh bar zawnna ngelnghet, chhuan lo la awm leh zel tur te pawhin an la chhawr theih tur neihdan tur a sawipui.

  He inkawmhonaah hian RMI Foundation, ICLEI, United Nations Environment Programme (UNEP) leh United Nations Development Programme (UNDP) aiawhte an tel a, Minister hian Mizoram sawrkar chuan hmasawnna tluantling leh tlo a ngaih pawimawh thu sawiin, khawvel sik leh sa chhe zel pawh tuar thei, kan chhehvela nungcha te venghim reng chung si a khuarel chhiatna thleng thut thei laka invenhimna ni bawk, state chhunga cheng te zawng zawng rualkhai taka hmasawntirtu ni thei ngei hmasawnna a ngaih pawimawh thu leh Mizoram chu a hmahruaitu nih a, North East state dang te tan pawha entawn theih an nih ngei a beisei thu a sawi a ni.

Aizawl DC-in bawlhhlawh khawnna motor a semchhuak

Aizawl; Aizawl District Water & Sanitation Mission (DWSM) chuan July 27 zing khan State Water & Sanitation Mission (SWSM) atanga an dawn, Aizawl District tana tawihtheilo khawn khawmna tur Motor (Dry-Waste Collection Vehicle) pali (4) sem chhuahna Aizawl DC Office kawtah a buatsaih a. Aizawl DC leh Aizawl District Water & Sanitation Mission (DWSM) Chairman ni bawk, Er. Lalhriatpuia chuan a hmangtu tur te hnenah a hlan chhawngin, a vailiam nghal a ni. 

  Lirthei 4 (Dry Waste Collection Vehicles) te hi Swachh Bharat Mission Grameen (SBMG) atanga lei niin, Motor Pasarih lei a ni a, Seling Plastic Waste Management Unit enkawltu, Vanzel EcoSolution hnenah pahnih leh Aibawk Plastic Waste Management Unit enkawltu Waste Tech & Bio-Energy hnenah pahnih a hlan a ni. PHE Department enkawl SBM-G hnuaiah hian, Mizorama pumah hmun 5-ah tawihtheilo bawlhhlawh sawngbawlna hi mumal taka kalpui mek a ni.