Aizawl: Environment, Forest & Climate Change Minister T.J. Lalnuntluanga chuan Zirtawpni khan Mizoram Pollution Control Board (MPCB) office a tlawh a, Minister hi EF&CC Deptt.-a PCCF/Principal Secretary leh MPCB Chairman ni bawk Dr. CH. Muralidhar Rao (IFS)-in a tâwiawm.

Minister hi MPCB-a Member Secretary Pu C. Lalduhawma’n lo dawngsawngin office leh staff-te dinhmun leh mamawhte en kualin an sawi ho nghal a ni. Minister T.J. Lalnuntluanga hian MPCB hnathawh hrang hrangte thlirin mi nâwlpuiina kan hriatpui loh hna tam tak, kan hrisêlna nghawng thei thil leh Court Case chena thawktu tlêmtê-in an thawk chu ropui a tiin an inpêknaah fakawm a ti hlê a, thawktu tam zâwk an mamawh thu a sawi bawk.

MPCB-in Sikulpuikâwna Continuous Ambient Air Quality Monitoring Station (CAAQMS) an bun thar chu kan boruak dinhmun englai pawha hriat nghal mai theihna tur thil tangkai a nih thu leh Mizoram hmasâwnna pawimawh tak a nih avângin hun remchâng hmasa berah official taka hawn ni se an ti.

MPCB Laboratory hi Accredited Laboratory a nih theih nân tihlena tihchangtlun a tûl thu hmuhpuitu Minister hian hmun mamawh belh pawh chak taka ngaihtuahsak a tiam a ni.