Aizawl: Chief Minister Zoramthanga chuan, “Sum leh pai leh ei leh bara intodelh lo tan chuan hnam thinlung nghet taka put thenkhat tan a har thin avangin ei leh bara intodelh hi sawrkar ngaih pawimawh ber a ni,” a ti

Delhi Mizo Zirlai Pawl (DMZP) in Zirtawpnia an dincham kum 60 na champha leh kumin atana zirlai kal tharte inhmelhriatna leh inlawmna hun (Freshers Orientation & Social, 2019) Mizoram House, Vasant Vihar, New Delhi-a an buatsaih ah khuallian nia he thu hi sawiin Chief Minister chuan hnam humhalh chu mitin mawhphurna a ni, a ti a. Socio Economic Development Programme chu chak tak leh a tha thei ang bera kalpui a tum thu sawiin Chief Minister chuan, “Chawa intodelh bakah rua leh mau hmanga nasa taka hmalak tum a ni a. Zirlaite chu ram, hnam leh sakhua chhuantlak kan neih zel theih nan kan ni tin nunah Pathian hre reng tur leh Zonunmawi nunpui zel tur kan ni,” a ti.

Chief Minister chuan Delhi-a Mizo zirlai awmte chu hnam darthlalang, Mizoram hmel lanna pawi-mawh tak an nih thu a hrilh a. An zirlaiah theihtawp chhuah tura fuihin, Mizote chu India hmarchhak mai ni lo India ram pumah hmahruaitu an ni thei tih chu vawng reng turin a chah. Zoramthanga hian Mizoram vanneihzia sawiin, “Pathianin boruak nuam tawk tak, ruahtui tam tawk leh thlai engpawh that duh em emna ram min pe a, a chhunga chengte pawh tawng khat hmang, sakhaw khat vuan kan ni a, kan inpumkhatna a tha bik. Lei chhungril hausakna lamah pawh tuialhthei leh gas hai chhuah tur tam tawk tak a awm niin a lang,” a ti a. Chung malsawmnate a nih ang taka hman tangkai thiam chu Mizote kutah a tlak thu a sawi.

He inkhawmah hian Delhi-a Mizo zirlai thahnem tak an tel a. CM hi Dr. C. Vanlalramsanga, Planning Secretary, David Lalthan- tluanga, Addl. R.C, New Delhi leh CM Private Secretary Lalhmansanga ten an tawiawm a ni.