Aizawl : Tawngtai Bethel Camping Centre (TBCC) 'electric disconnect' thut a nih avangin an harsatna tawhte finfiah turin, TBCC Sakawrtuichhun hmunah nimin khan MPYCC President Dr. Lalmalsawma hovin Congress Thalaiin an tlawh.

Dr. Lalmalsawma chuan, "Mi 700 dawn lai tunah hian TBCC-ah hian an awm mek a, khaw lum karah harsatna nasa tak an tawk dawn a, an dinhmun en hian ngaihtuah ran an ngai a ni. Sawrkarin ngaihdamna sang ber nena connection pe leh nghal tur te, concession pe tur leh mi thil phal te pawhin ngaihven rang turin kan ngenpui tak meuh a ni," a ti a. TBCC-ah hian zu leh damdawi (drugs) hmansual avanga harsatna tawkte dahkhawm an ni a, khawlum lutuk nen harsatna an tawh palh a hlauhawm hle a ni, MPYCC President chuan a ti.

Tawngtai Bethel Camping Centre hi Kum 2019-a an insawn kumah Electric pawt lutin, Rs. 1,40,000/- an seng a ni. Phase III an mamawh ni-a inngaiin an pawt a, mahse electric bill chu Chawnpuia an chawi ang thla khata Rs. 2000-3000/- chawi tur emaw an in tih laiin, bill a lo san tak em avangin an pe thei lo ta fo a, Phase hrangin an tih tir leh hnuah bill a la ngai reng tih  T.T. Zohmingthanga, TBCC Founder chuan MPYCC hruaitute a lo hrilh.

T.T. Zohmingthanga chuan thla hmasa lam atang khan an electric bill cheng nuai 5 dawn lai mai an pek theih loh avangin disconnect tura hriattir an nih thu a sawi a, a zatve tal chhunglut turin tih an lo ni bawk a, an neih ang ang Rs. 25,000/- an chhunglut tih a sawi a, 16.7.2022 hian TBCC electric connection chu tihtawp sak an lo ni ta tih MPYCC hruaitute chu a hrilh a ni. Congress Thalai President hian TBCC hi Rs. 10000/- in a tanpui nghal a ni.