Electric Veng Branch YMA Literature & Education Sub-Committee te buatsaih 'Career Fair' chu May ni 11 (Inrinni) chawhma dar 11:00 khan Electric Veng YMA Hall-ah Pu C. Lalrokhuma, President Electric Veng Branch YMA chuan a hawng.

Career Fair hi zirlai naupang ten lehkha an zir chhoh zelna turah kawng dik zawk leh ngaihtuahna fing tak an neih theihna tur leh nakina eizawnna kawng an zawh hun a hlawhtlinna an neih theih nân a buatsaih a ni a. Nikum 2023 khan hlawhtling takin a lo buatsaih tawh bawk.

He Career Fair-ah hian Stall hrang hrang a awm a, heng Subject Arts, Science, - Commerce, Management leh Law- te a awm dawn bakah Military/Force (Sipai), Medical, Engineering leh Entrepreneuship lama tui mite tan Stall buatsaih a ni bawk. Stall- ah hian hetiang lama hlawhtlinna lo nei tawh veng chhung mithiam takte rawn theihin an ṭhu a ni. Tin, heng bakah hian ITI leh Women's Polytechnic lam te Career Fair-a tel turin sawm an ni bawk.

EYMA hian nikum khan Career Fair hi hlawhtling takin a lo buatsaih tawh a, School naupang tlawhtu an thahnemin a kal ten hlawk thlak an ti hle. Tin, School naupang mai bakah naupang thenkhat chu an nu leh pa ten rawn hruaiin hun hlawk tak an rawn hmanpui bawk a ni. He Career Fair hi zirlai naupang pawl kua (Cl-IX) chin chung lam tana buatsaih a ni a, Career Fair hi chawhma dar 11:00 ațanga tanin tlai dar 3:00 thleng neih tur a ruahman a ni.

Electric Veng Branch YMA chuan YMA kumpuan 'Ram leh hnam humhalh' tih hlawhtlinna kawng khat atan zirna uar leh lehkha zir dan dik zawk inkawhhmuh hi a ngai pawimawh hle a. Pawl 10 leh 12 result nghak mekte tana lehkha zir chhunzawm dan tur inkawhhmuhna leh infuihtharna atan he Career Fair hun hi a buatsaih a ni. He hunah hian Veng chhung zirlai mai bakah Neuhof English Medium School te leh Dawrpui School of Science & Technology te chhim tura sawm an ni a, zirlai naupang kal an thahnem hle.

Electric Veng Branch YMA chuan he Career Fair a hlawhtling theih nân sum leh pai a tum mai bakah Samagra Shiksha, Mizoram leh MS Academy ten sum leh paia an ṭanpui avangin lawmthu an sawi.