ZALEN October 11, 2024 : Mizo Hnam Runah chhung inkhawmna vawiin khan neih a ni a, Deputy Speaker hlui H. Biakzuava chuan thusawiin, ZPM Sawrkar chu enchhin sawrkar an nih angin thla 10 enchhin an ni tawh a, an la che chhe hle a, tun ang zela an kal chuan an tuarchhuak theih a rin loh thu a sawi.

Biakzauva chuan, "Kawngchhiat em em laiin Tuialhthei man an tipung te hi thil inhmehlo tak a ni a, an tuarlo tura ngaihte pawhin an tuar zel a, kan Driver te pawhin MNF sawrkar kha an ngai hle niin an sawi a. ZPM chu an opposition laia an insawi ang niloin ruling-ah chuan an lo danglam hle a, opposition atan khan an tha ber a ni," a ti.

MNF Adviser chuan, "Sawrkar thla 10 leka upa ah chuan mipui sawisel nasat ber tum a la ni, a chhan chu tih tura an sawi an tih loh leh, tih loh tur an sawi an tih leh si te a ni a, kalphung thar a awmlo a, an thil thar tih ve pawh a tha lo lam zel a la ni. Bangla pawh kan la chhuahsan hma hma in an rawn ri nghal bur bur mai a, ka'n zawhchian nak chuan ZPM MLA te bangla chei tha tur thawm a lo ni a, kalphung thar hi a letlingin a kal mek a, mipui bum nan thu tha tak tak an rawn sawi a, mahse an sawiloh ang hlirin an duh ang chu an kalpui hmiah hmiah a, kalphung thar niloin 'Duhphung thar' ka ti a ni," a ti.

Biakzuava chuan, "Opposition nih vanga sawrkar sawisel reng tur a tul ber lo a, amaherawhchu, kan ram leh hnam leh mipui tana tha lo chu kan sawisel zel dawn a. ZPM sawrkar hi ka hriat ve chinah rualkhailo ber leh chhim lam ngaihsak dertu awmchhun an ni a, mipui pawhin an sawi duh tan hle a ni," tiin, "Chhim lam MLA te hi chanvo pawimawh chang tura 'fit lo' leh a ngaihna hrelo hlir em ni an nih? Nge, an chhungkaw inhruipawhna hi an la chhunzawm zel zawk? tih hi ka zawhna a ni," a ti bawk.