Aizawl: Excise & Narcotics Department thawktute chu drugs an buaipuina lamah Covid-19 hrikai an tam hle a, hei vang hian office hnathawh pawh a buaiphah hle nia thudawn a ni.    

ZALEN in Excise & Narcotics department thawktu te hnen atanga thu a dawn danin Covid-19 hri kai te hi Narcotics lama thawk te an ni a, Narcotics lama thawk zinga 40% vel chu hri hian a tibuai a, hei vang hian an buai hle niin an sawi. END hotu te chuan dan phal loha ruihhlo zuar an man te nen lirthei pakhata an chuanho thinna atanga hri hi kaidarh ta nia an rin thu an sawi a. "Ruihhlo zuar kan man te nen lirthei pakhatah kan chuangho lo thei lo a, heta tang hian kan kaidarh ta ni berin kan hria a. Tunah hian hrikai mai bakah khunghrang mek kan ngah a, kan hnathawh pawh a khaihlak phah hle a ni," an ti. Excise & Narcotics Department a hrikai te hi Narcotics Squad lam mi deuh vek an ni a, zu lam buaipuitu lam chuan hri hi an kai ve lo nia thudawn a ni.

Excise & Narcotics Department thawktute chuan tunhnaiah Myanmar atangin heroin rawn lut a awm tan leh nia an hriat thu ZALEN an hrilh a. "Myanmar tualchhung buaina avang khan hun engemaw chen chu heroin lo lut hi a awm mang lo a, mahse tunhnaiah hian lo lut a awm leh ta zeuh zeuh a. Heng te hi buai hmaa an kawl sa te hiin kan ring a, mahse demand a san loh avangin heroin zuar te pawh hian hralhna an van hle niin kan hria," an ti bawk.

END Officer pakhat chuan heroin lo lut chu tam leh deuh mahse a rate a hniam hle niin a sawi a. "Ruihhlo mamawhna (demand) hi a tlahniam deuh niin kan hria a, a zuar te pawh hian an hralh to hleithei lo a. Tunhma deuha hawng khat Rs. 55,000 vel ni thin khan tunlai chuan Rs. 35,000 atanga 40,000 vel te pawhin hmuh tur a awm niin kan hria," a ti bawk. 

Excise & Narcotics Department chhinchhiah danin September ni 10,2021 thleng khan Mizoramah damdawi hmansual vanga thi mi 40 an awm tawh a, damdawi hmansual vanga thi te hi mipa 36 leh hmeichhia 4 an ni a, an vai hian heroin kaihhnawiha thi vek an ni. Mizoramah kum 1984 atang khan damdawi hmansual vanga thi hi mi 1686 an awm tawh a, an zinga 1489 hi mipa niin hmeichhia 197 an awm tawh bawk.