ZALEN March 30, 2025 : Mizoram Electricity Regulatory Commssion (MZERC) chuan kum thar, April atanga êng chhit/hman man chu chawhrualin unit khat Rs. 7.82 ni turin a bithliah a. Eng chhit man hi tihsan a nih loh avangin sawrkarin subsidy a tum tur chu vaibelchhe 180.80 a ni dawn.

P&E Dept-in kum thar (FY 2025-26) chhunga consumer-te êng pek nan unit khat zelah Rs.11.28 mamawh tura an insawi laiin commission-in ARR a bituksak atanga chhutin an mamawh hi unit khat zelah Rs.10.97 a ni. Rs.10.97 hi subsidy tel lova chawhruala unit khat zel man tur Full Cost Tariff (FCT) a ni a, sawrkarin subsidy a pek loh chuan FCT hman tur a ni. 

Subsidy Rs. vaibelchhe 180.80 hi sawrkarin advance-in thla tin Rs. vaibelchhe 15.06 a pe tur a ni a, a pek loh chuan FCT hmangin bill siam tur a ni a, sawrkarin subsidy a pek hunah bill-ah adjustment siam leh tur a ni a. Sawrkarin subsidy a peksak chuan tlawm zawkin mipui hnenah chawhrualin unit khat man Rs. 7.82 vel zelin an pe thei dawn ta a ni. Sawrkarin consumer-te subsidy a peksak tur hi a pum puia chawhrualin unit khatah Rs. 3.15 vel zel ang a ni.

P&E Deptt-in kum FY 2025-26 chhung atan ARR leh tariff bithliahsak tura an dilna chungchang hi March 11 khan Mizoram State Advisory Committee meeting-ah sawiho a ni a. Hei bakah Tariff Petition chhungchangah hian March 12 khan Aijal Club-ah public hearing neih a ni a. Hetah hian hun bituk chhunga rawtna leh sawiselna siam awm chhun thu thlen leh P&E Department-in an chhannate ngaihthlak a ni.

P&E Deptt hian kum FY 2025-26 chhunga power supply enkawl nana revenue sum mamawh (ARR) Rs. vaibelchhe 754.69 bituksak turin commission an dil a, hemi hmuchhuak turin sawrkar kum 2024-25 chhunga tariff hi tisang lova sawrkar kum 2025-26-a hman chhunzawmin sum mamawh hmuh phak lohna chu Mizoram sawrkarin subsidy Rs. vaibelchhe 199.77 emaw, commission-in ARR a bituksak atanga 26.47% emaw, heta a tlem zawk zawk hian a phuhruksak dawn tih an sawi.

An dil ang chuan êng chhit man thar tur hi chawhrualin Unit khat man Rs. 11.28 ang vel tur a ni a. MZERC hian P&E Deptt sum mamawhnate a zir chian hnuin ARR atan Rs. vaibelchhe 686.66 a bituksak a, hei hi kawlphetha hralhna atanga hmuh tur a ni. 

Commission chhut danin Tariff kan hman lai mek hmanga Mizorama chhunga power hralhna atangin kum thar FY 2025-26 hian Rs.448.93 Cr leh kawlphetha hman bang ram pawna hralhna atangin Rs.56.93 Cr an hmuh theih beisei a ni a, hei hi avaiin Rs.505.86 Cr a ni. Hei hian Rs.180.80 Cr (i.e, 686.66 – 505.86=180.80)-in ARR a phuhru zo lo a. A phuhruk phak lohna hi sawrkarin subsidy Rs. 180.80 Cr pe-in a pek sak theih dawn avangin Tariff hman laia eng chhit man rate hrang hrang te hi kum FY 2025-26 atan hmang leh turin Commission-in thutlukna a siam a, Tariff hman lai tihsan a ni lo. 

Kum thar FY 2025-26 chhunga Mizorama-a consumer te kawlphetha hman zat tur hi 574.28 MU ni turin chhut a ni a. Sawrkar kum 2024-25 tariff hmangin P&E Deptt.-in kum thar hian consumer te hnen atangin Revenue Rs.448.93 Cr hmu thei turin beisei a ni a, a pumpuia chawhrualin kum thar FY 2025-26 chhunga unit khat man tur chu Rs.7.82 a ni. 

Kumin FY2024-25 aia kum thar FY 2025-26 chhunga consumer te kawlphetha hman zat a tam dawn avangin Tariff hi tih san ni lo mahsela, kum thara Revenue hmuh tur hi kumina hmuh tur beisei zat aiin Rs.11.52 Cr-in a tam. Tariff Order thar hi ni 24.3.2025 khan siam a ni a, kawlphetha ni 1.4.2025 atanga hman man chhutna tur a ni. 

Kum thar FY 2025-26 hian Mizoram pawn lam Generating Station hrang hrang leh Tuirial HEP Generating Station atangin kawlphhetha 784.7 MU vel lei a tul dawn a, heng atanga leina tur hi chawhrualin unit khat man Rs.5.14 a ni ang. State chhung Tuirial HEP atangin Free electricity 28.32 MU, Solar Generation atangin 39.54 MU leh Small Hydel Generation atangin 37.07 MU neih theih beisei a ni. 

Kum FY 2025-26 chhungin Transmission loss 2% leh Distribution loss 25% chhut telin kawlphetha kan hman tur hi 781.34 MU ni turin chhut a ni a. Kan hman bang phai lama hralh theih tur 96.49 MU vel awm thei tura chhut a ni. Mizoram chhunga Transmission leh Distribution-a kawlphetha luangral tur hi 207.06 MU vel a ni ang. 

Kum 2025-26 hian Mizoram pumah consumer hi 3,24,698 awm tura chhut a ni. Domestic consumer 2,96,394 leh commercial consumer 15,913 awm turin chhut a ni a, Domestic consumer zingah hian chhungkua 19,045 vel KJ consumer awm turin chhut a ni. chhut a ni. 

Commission hian kum FY 2025-26 atana Subsidised Tariff bakah Agriculture & Irrigation category tel lovin Time of Day (TOD) Tariff (hman hunbi azira rate bithliah) a siam a. TOD Tariff hi Smart meter hman hunah hman theih a ni ang. Smart Meter hmang thei turin P&ED in RDSS a thawk mek a ni.