DOWNLOAD OUR APP

Read latest news on your phone
app-store
Engti zawng pawhin buhfai phur dawn Buhfai a tam, phur chhuak tan mek
Dec 01, 2019

Aizawl: Mizorama buhfai phurtu lian Carrying Contractor te leh Mizoram Truck Driver Association (MTDA) te inkar buaina kal zel avangin ni 20 chhung zet chu retailer te sem turin buhfai phurh mumal a ni tawh lo a, nimin thleng khan heng pawl pahnih te hi an la innawr buai reng. FCS&CA changtu Minister K. Lalrinliana chuan engti kawng zawng pawhin buhfai an phur dawn tih a sawi a, buhfai a tam thu a sawi bawk.

Mizoramin buhfai a chawkluhna lian ber Bairabi lamah pawh nimin thleng khan buhfai phur tur truck 120 vel zet te chu driver awm lovin helai hmunah hian an awm a, Minister leh department hotuten Bairabi VC leh khawtlang hruaitu te buhfai a rawn luh theihna atana hmalak tir an tumna pawhin awmzia a nei lo. Ramrikawn ah tih loh, FCI godown hrang hrangah buhfai phur chhuak tur motor driver ten an lirthei an thutchilh lo deuh vek.

FCS&CA Minister chuan buhfai harsatna chungchangah hian Chief Minister Zoramthanga pawh an rawn tawh thu a sawi a, nimin khan Deputy C.M. Tawnluia hovin Supply Minister bakah hian Minister Lalchhandama Ralte, Minister Lalruatkima, Chief Secretary charge la mek J.C.Ramthanga, IAS leh department official te an thu khawm nghal a, December a buhfai sem tur nei daih lo Supply Centre 35-a buhfai pek dan tur leh FCI godown atanga Mizoram buhfai tang phurh chhuah a nih theihna turin thutlukna an siam.

An thutlukna ang chuan naktuk Thawhtanni, December 2, 2019 atang hian bul tan tumin hma lak tur a ni a, mipuiten sawrkara chanvo an neih, an buhfai dawn tur an dawn lohna tura hma late hi sawrkar chuan a ngaih zam loh tur thu an thuchhuah-ah tarlan a ni. Hemi chungchangah hian K. Lalrinliana chuan, “A tul a nih chuan sawrkar department truck ho te pawh kan hmang mai ang, a tul chuan police lam pawhin an escort mai ang,” a ti a, he thil thleng avang hian Mizo mipui te chu chi-ai lo turin a ngen.

Ni eng emaw zat an buai hnuah nimin khan carrying contractor lam hian Ramrikawn FCI godown atangin buhfai hi phurh chhuah leh tumin hma an la leh a, motor 23 chu buhfai phurchhuak tur hian an thawkchhuak a, police te venna karah buhfai an phurchhuak thei a, heng lirtheite hi police lam hian an veng zui a, driver thenkhat mante pawh an awm niin thudawnna chuan ZALEN a hrilh.

Nimina buhfai phurchhuah a nih hma hian department lam leh contractor hian phurchhuah an lo tum tawh a, mahse, harsatna neuh neuh avang in an phurchhuak thei lo. Nimina press mite a hmachhawnnaah Supply Minister K. Lalrinliana chuan, “Mizoram-a kudam 35 zetah December tla buhfai a awm tawh lo a, nghawng thui tak a neih lohna turin hma kan la ang, engti kawng pawhin buhfai khan phur dawn,” a ti.

Buhfai phurh chungchangah hian MTDA leh Carrying contractor te inkarah boruak a sang hle a, thenkhatin an buhfai phur duh lo an driver te an ban a, Truck driver association lam pawhin buhfai phurh tum driver thenkhat chu an member atangin an bân nia thudawn a ni.

India leh Myanmar Border Fencing
India leh Myanmar ramri hung tum chungchang hi eng nge i ngaihdan?
Hung hi tha ka ti lo
Hung se ka ti
Ngaihdan ka nei lo

Latest News & Chhiar Hlawh