ZALEN October 28, 2024 : Home Minister K. Sapdanga chuan Central sawrkar chetmuang avangin sum puk a ngai thin a ti a, eptu party ten an rulh sawi duh si lo a, an puk ringawt an sawi chu tha a tih loh thu a sawi a, eptu party lam chuan AR sawnchhuah an hlau niin a sawi bawk.

Vawiina ZPM chhung inkhawma thu a sawii naah Sapa chuan, “Sawrkarna kan chelh hnuah Central Sawrkar laipui inthlan a lo hun ve leha, sawrkar intawm BJP kaihhruai a lo din tak avangin tun thlengin state hrang hrangte sum hmuh tur sem chhuah kawngah an che muang hle a, chu chuan keini state pawh min nghawng na hle a, chuvangin loh theih lova sum puk a ngai a, amaherawh chu kan pukte hi kan pe leh nghal zel a ni. Hetih lai hian eptu party lam chuan kan pek sawi duh lovin kan puk ringawt an tlangaupui duh zawng a lo ni a, Central sawrkar chaktawk loh avangin beisei angin hma kan la thei lo a ni,” a ti.

Home Minister chuan, “Sawrkar kaltawh ten tithei bik tura insawia politics khelh nana an hman thin chu AR insawn chhuah chung chang hi a ni a, theih tawp chhuaha kan Chief Minister hmalakna Pathianin mal a sawma tunah chuan Assam Rifles insawnchhuahna tur thuthlung kan lo ziak fel thei ta a ni. Hetih lai hian an sawrkar laia sawn chhuak chak em em eptu party lam chuan sawn chhuah an hlau leh lawi si a, hei hi thil mak tak chu a ni,” a ti.