ZALEN May 30, 2024 : Mizoram Police 1047 zet, Lok Sabha inthlana vote thlak thei lova siam an nih chungchangah an lungawi loh thu eptu party ten Prime Minister leh Chief Election Commissioner te hnenah ziakin an thlen a, vote an thlak ngei theihna tura hmala turin an ngen.

Prime Minister Narendra Modi leh Chief Election Commissionerm Rajiv Kumar te hnenah eptu party te hian lehkha inang an thawn a, Mizoram State Armed Police Force (SAPF) Company 15-a Police 1047 te chu Bihar, Uttar Pradesh leh Madhya Pradesh-ah te MP inthlan duty tura tirh chhuah an nih thu an lehkhaah hian an tarlang a. Mizoram bikah April ni 19 ah vote thlak a ni dawn tih leh inthlanna buatsaih dan tur kimchang pawh hriat lawk vek a ni tawh chungin, heng Police-te hian vote an thlak theihna tur ruahmanna engmah siamsak hmasa lovin Mizoram sawrkar thuneitute chuan inthlan duty turin Mizoram pawnah an tir chhuak a, hetianga Police 1047 zet vote thlak thei lova siam hi State sawrkar hmalakna hnuaia Dan bawhchhiatna lian tak a ni an ti.

Eptu party te hian Election Commission of India leh India sorkarin tun tum Lok Sabha inthlana vote thlak vek tura vote nei te zirtirna beihpui an thlak dan chu fakawm an tih thu an sawi a, hetihlai hian Mizoram sawrkarin a hnuaia thawk Police 1047 zet mai vote an thlak theihna tur remchang siamsak hmasa lova inthlan duty tura a tir chhuak chu ram Danpui hnuaia an dikna leh chanvo bawhchhiatsakna langsar tak, mipui rorelna chawisang zel tura hmalakna kalha chetna a ni an ti.

Eptu Party te hian an dikna chanvo bawhchhiatsaka awm mek Mizoram Police 1047 ten June 4, 2024-a vote chhiar a nih hma ngeia vote an thlak ve ngei theih dan tur ruahmanna siamsak turin Prime Minister leh Chief Election Commissioner te chu an ngen a. An lehkhaah hian MPCC President Lalthanzara, MNF President Zoramthanga, BJP President Vanlalhmuaka, Mizoram PC Party President Vanlalruata leh AAP Mizoram President Andrew Lalremkima ten hming an ziak a ni.