Registered pharmacist Jerry Lalduhzuala lehkhabu ziah, natna, damdawi, vitamins, minerals leh a dangte awlsam têa sawi fiahna, ‘Hriselna Huang’ tih chu Inrinni chawhnu khan Social Welfare & Tribal Affairs Minister Er. Lalrinawma’n Tourist Lodge, Chaltlang-ah a tlangzarh.

Minister chuan a zira zir chhuak ngat tlangvalin damdawi chungchanga hriat tur pawimawh, mipui kaihruai thei tur tam tak a ziahte chuan rah tha chhuaha hriselna, damna leh finna a tihpun ngei a beisei thu a sawi.

Dr. RK Lalrosiama hriatreng nana siam lehkhabu tlangzarhtu chuan inrintawkna nena mahni subject ngei behchhana Jeery-a’n lehkhabu a khawr pum thei chu fakawm a tih thu a sawi bawk.

Lehkhabu tlangzarh rual hian Vanlalhluna’n Dr. RK Lalrosiama hriatreng nana music video siam a tlangzarh nghal bawk.

‘Hriselna Huang’ hi Rs 250 man a ni a, damdawi leh hriselna lam zir kher lo mi nawlpuite pawhin an hriat thiam mai theih turin natna hrang hrang leh damdawi tlangpui chungchang ziah a ni.