A naupan deuh lai atang khan Pathian hla a sa thin a. Chumi hnuah Lenglawng hla a sa tam ber thung. Love song chu Mizo Idol-ah pawh khan vawi khat chiah a sa ve. Mahse, a rawn lar chhuahna ber ‘INCHHUANG MAI LO LA” tih a ni tlat. Hemi hnuah mi hriat a rawn hlawh chho a, chart lamah pawh a rawn hlawhtling chho phian. Mizoram chhung mai bakah hriat a hlawh tawh hle. Tunah phei chuan ram pawn atangin FIVE STAR HOTEL a zai turin, hlawh tha tawk nen an rawn thlem tan.... a la inchhuang duh mai lo! Mizo Idol atangin Aw, kum 2013-2014 ah khan ka tel ve. Top 20 thleng chu ka inlan ve nghe nghe. Inbuatsaihna engtin nge? Ka naupan lai atang tawhin, High School function-ah te, YMA thil tihna angah te zai turin min ko chhuak ve fo a. Hei vangte hi a nih ka ring Mizo Idol-ah tel ve turin min ti fo a. Ka duh chiah lo nain, tum lawk ren run lem loin a 'form' te min lak chhuah sak hnuah ka tel ve ringawt, inbuatsaihna pawh nei lem loin. A tirin Pathian hla i sa sia? Nia, a tirah Pathian hla ka sa a, a hmain lenglawng nen, love song kha chu Mizo Idol-ah khan pakhat chiah ka sa ve. Lenglawng ka sa tam ber. Lenglawng atangin Gospel, chumi hnuah Lengzem? A hma chuan mipui hmaa love song sak hi ka rilruah a awm lo. Tun thleng pawhin ka sa ang tih ka la ring pha lo. Mahse, hun a rawn inher zel a, sak kual vel hi kei chuan a tha ka ti a. A chhan chu, ka tan nakkin zela la hlut tur a ni a. Pathian hla, lenglawng leh love song te hi kei chuan ka thliar hrang lutuk lem lo a. Variety thei ang ber tur kha sak ka duh zawk. Tin, ka ngaihdan chuan music genre hi gospel leh love song tia thliar hran chiah ka ngai miah lo. I single hmasa ber kha? 'Inchhuang Mai Lo La" tih hla kha a ni. Mizo Idol atang khan hmelhriat chu hlawh viau mah ila, min hriat ve tak takna nia ka hriat chu he ka single hmasa ber hi niin ka hria. Kan buaipui rei khawp mai. Engvang nge in buaipui rei? Nia, kan ti rei a, kan ulukin edition tih chhung pawh a rei khawp mai. Nikum June thla tawp atangin kan buaipui chho a, kar khatah vawi khat ang velin shooting kan nei. Min buaipui tawpa, Rinliana Chhangte khan ka hak tur te leh eng ilo vel te chu a rilru zawng zawng sengin min buaipui sak a, Siama (SVP) pawh a hah bawk a, a nalh thei ang berin kan ti ang a ti a. Min duhsakna tak tak an nei hi ka lawm. Ka single hmasa ber hi June thla tawpa kan buaipui tan chu September-ah TV lamah kan dah lut a, October atangin chart-ah a lang ve. 5 Star Hotel atangin sawmna duhawm? Aw, ka vannei ka ti dawn nge, sawmtu chu nei ve tho. Mumbai leh Chennai tih angreng atangte'n sawmna ka dawng ve a, 5 Star Hotel a ni tlangpui lehnghal. Hlawh pawh an insawi ang chuan a tha dawn khawp mai a. Chutah, college a kal pah theih dawn bawk nen, tum chu ka tum. Amaherawh chu, tunah chuan engmah ka la sawi chiang thei lo. Thil hi vawikhata tih theih ngawt a ni lo a. Tum erawh chu ka la tum e. Zaia zin chhuak rih lo? Zirna lam hi tlema han ngaihtuah ve deuh ka duh tunah chuan, programme pawh ka la mang lo. Class ka la kal lakloh a, attandance te a pawimawh a, heti lam (Hnahthial) lamah ka awm rih. Hnahthial College-ah BA 4th Sem. ka zir mek. Zai aiin zirna? Zai te hi chu ka tui a, nuam pawh ka ti. Mahse, lehkha zirlai ka nih angin ka dah hmasa lo thei loa. Ka hun tam zawk hi Hnahthialah ka hman a ngai. Chutih laiin, zai hi thulh chuang lo ila ka ti. Pasal lam te? (Hehe...) Ka la tum lo. Pathian zarah dama kan la awm te a nih chuan pasal neih te chu hmanhmawh thlak loh. Track thar te? March thla tir khan ka single pahnihna — Hey — music video ka ti chhuak a. Tunah Thazual chart-ah pathumna a huah mel. He hla hi Mystiq Sailo phuah a ni. 'Si Maw' tih hla Tete-i hla sak lar deuh phuahtu tho kha a ni. Hei chauh lo pawh hi siam chu ka tum a. Leikapui lam hawi deuhte siam ka tum a. Hei hi sa tura min rawn tih a ni. Hei bakah RK Bawitlung hla pakhat chu ka single thar tur buaipui ka tum deuh a. Mahse, ka nghal deuh rih ang. Hla siam tur a awm ve nual. Chubakah, ka awm dan tur te han chiang phawt se.