Kangthelhtu mi sang chuang chuan Portugal, Spain leh France chhimthlang lama ram nasa taka kang thelh tumin an bei mek a, hetih lai hian khaw lum uchuak tak chuan kian lam a la pan mai hmel loh hle.

Portugal hmar lam, Spain nena an inrina bul lawk, Foz Coa-ah chuan tui phur thlawhna (waterbombing plane) tlaah a khalhtu a thi.

France-a Gironde region chu kangmeiin a man kai zau zel a, mi 12,000 chuang hmun himah insasengtir an ni tawh.

Spain chhim lam, Costa del Sol-ah chuan Mijas tlanga ram kang a zau zel avangin mi 2,300 chuang an insaseng tawh bawk.

Torremolinos-a vaukama chawlh hmangte chuan tlang panga meikhu chhah tak an hmu phak reng a, thlawhna eng emaw zat hmanga thelh hna thawh mek zel a ni.

Hetih lai hian France chhimthlang, Atlantic vaukam hrula ram a kanna bul lawka cheng pakhat chuan an thil tawn mek chu ‘a rapthlak tak zet’ tih a sawi.

“Tun hmain hetiang hi ka la hmu ngai lo,” tiin Teste-de-Buch bula cheng, Karyn-i chuan news agency AFP a hrilh.

Bordeaux khawpui chhim lam hreta ram kang mek pawhin hectare 10,000 dawn a kang chhe tawh a. Kangthelhtu mi 3,000 velin an thelh mek.

Portuguese pilot thi hi Fire Boss amphibious thlawhna hmanga amah chauhva thlawk chhuak a ni.

Portugal-a ram kang nasa ber hi Porto khawpui atanga hmarchhak a ni a. Ram hectare 30,000 chuanga zau kuminah a kang tawh a, kum 2017 hnu lama nipui laia a kan zau ber tum a ni tawh a, hemi kum hian Portugal hian ram kang nasa tak tuarin mi 100 vel an thi.

Ram kang hian Mediterranean tuipui kam pawh a tibuai mek tawh a. Italy-ah chuan sorkarin an rama lui sei ber, Po Valley-ah emergency a puang.

Greece-ah kangthelhtute chuan Feriza huam chhunga ram kang an thelh mek a, hei hi Athens chhimchhak lam km 50 vel a ni a, Rethymno bul lawk, Crete vaukam hmar lam a ni a. Rethymno-a khaw sariha chengte chu suan chhuah an ni.

Morocco hmar lamah chuan Larache, Ouezzane, Taza leh Tetouan province-a ram kang nasa tak avangin khaw eng emaw zata chengte chu hmun hima suan chhuah an ni a. Ksar El Kebir-a khaw pakhat phei chu a kang chhe vek tawh a, mi pakhat a thi bawk.

EUROPE a lum lutuk

Thawhlehniah khan Portugal-ah chuan khaw lum lam chu 47°C zet a ni a, Spain-ah pawh 40°C chung lam a ni a, khawpui dai vel phei chu a rovin a lum em em a, kangmei pawh a chhuak hma thei hle.

Portugal leh Spain-ah hian khaw lum lutuk avangin mi 300 chuang an thi tawh niin Spain-a Efe news agency chuan a tar lang.

France-ah pawh chawlhkar khat lo awm leh tur chhung chu 40°C chung lam a la ni thei a, department 16 zet huam chhung chu orange alert pek a ni.

Khawvel hmun hrang hranga sik leh sa inthlak nasa avangin khaw lum uchuak tak hi a na tawlh tawlh a, a rei tawlh tawh a, sawi lawk a harsa tawlh tawlh bawk a. Industrial era hun lai aiin khawvel pum lum dan chawhrual hi 1.1°C chuangin a sang tawh zawk a ni.