ZALEN June 24, 2026: Co Ordination Committee on Ex-MNA Association leh PAMRA-te chuan MR MIZO KING youtube-in a channel-a MNF a sawi dan avangin Emergency meeting an ko a, he channel-a MNF te a comment dan chu a dik lo an ti a, zalenna sualtute tawrhna hetianga zawnga sawitu hi zawngchhuak turin theuneitute an phut.

Co Ordination Committee on Ex-MNA Association leh PAMRA te chuan he channel-a comment dan hi dik lo taka puhna an ti a, MR MIZO KING youtube Channel hian 'Nichin mai khan Burma sipaiten Mizo awmna an bomb leh, an che rapthlak tual tual' tih thupui a hmangin, Burma sawrkar sipaiten Burma ram chhunga Mizo khua Kanan leh Khampat te an bomb thu a sawinaah, rem lo chung chungin MNF chet dan dik lo tak a a sawi tiin pawi an tih thu thuchhuah an siamah an tarlang.

MNF Returnee te chuan, "MNF-te khan haw kan chak zek zek hauh lova, ram mipuite duh dan angin Remna thuthlung ti hlawhtling tur a rawn haw kan ni. Kan rawn haw kawngah khan kawng dal tum tumah an awm lova, Mizo mipuite kha remna lawmin kan hlim hle zawk a, MR MIZO KING hian dawt hul hualin min puhna avang hian kan rilru a na khawp mai," an ti.

Co Ordination Committee on Ex-MNA Association leh PAMRA te chuan YouTube Chanel neitu fel tak takte zarah beng a var phah thin a, chutih laiin Zalenna sualtute tawrhnate dawt phuahchawp hmang a beitu hi thuneituten tunge a nih zawng chhuak tur leh MR MIZO KING hian a thil tih sualah ngaihdam dil turin an phut a. Ngaihdam a dil lo anih chuan Co Ordination Committee chuan a tul angin hma a lak zel tur thu thuchhuah an siamah hian an tarlang.