Aizawl January 14, 2024 : Chief Minister Lalduhoma chuan, "Mizoram Excise Act ah hian mi tlawmngai leh thahnemngai te thuneihna a awm loh avangin kan siamthat (amend) a ngai a ni," a ti.

Excise &Narcotics Department in 'Ruihhlo do chungchanga Kohhran hruaitute nen inkawmhona' Excise & Narcotics conference hall-a neih a hmanpuinaah he thu hi sawiin Chief Minister chuan, "Mizoram Excise Act hnuaiah hian mi thahnemngai ten mi taksa, lirthei, in leh a dang dap theihna an nei ve lo a. Hetianga an neih ve theihna tur ruahmanna siam a. An nin an thil man te list uluk taka siama thuneitute an hlan theihna tur leh kan hnam dana kan her rem a tul a ni," a ti.

Ruihhlo chu tih tak zela do a tul tih sawiin Chief Minister chuan, "Ruihhlo hian min chim nasa tual tual a, Middle school zirlai thlengin a ti an awm tawh a. Nupa inthenna a tam a, kan damreilo phah bakah jail a tawt phah hle a ni," a ti a. Ruihhlo dotu zingah ruihhlo kaihhnawiha fihlim lo an awm nia sawi bawkin, "A thawktute atangin kan tan dawn a, tumah inhnamhnawih lo turin ka chah duh a. Hetianga inhnamhnawih kan hriat te chungah a tul angin action kan la zel dawn a ni," a ti bawk.

Excise & Narcotics Minister Lalnghinglova Hmar chuan ruihhlo do chu thalai atanga bultan an tum tih sawiin, "Ruihhlo hi do pui tur ni lovin kan do ho a ngai a, kan zavaia kan tan tlan chuan kan hneh thei tih kan hria a ni," a ti a. Kohhran thalai kalkhawmte chu an khawmpuiah minute 10 tal ruihhlo chungchang hi sawi turin a ngen bawk.

Excise &Narcotics Joint Commissioner Peter Zohmingthanga tarlan danin kum 1984 atanga January ni 11,2024 thleng khan Mizoramah ruihhlo hmansual vanga thi mi 1811 an awm tawh a, heng zinga 1592 chu mipa niin hmeichhia 219 an awm bawk. Manipur buai vangin Mizoram chu ruihhlo kalkawng atan hman nasat a ni tiin zirchianna ah heroin leh a kaihhnawih (opoids) hman tam lamah Mizoram chu a sang hle a. India rama opoids hmang 2.06 anih laiin Mizoramah chuan 25 chuang an ni tih a tarlang bawk.

Kohhran thalaite nen ruihhlo chungchang sawihona ah hian kohhran hrang hrang aiawh 12 an tel a ni.