Aizawl December 30, 2022: Excise & Narcotics Dept leh 2nd Assam Rifles te chuan December 29, 2022 (Ningani) zan dar 6:30 khan Tuikhurhlu-ah Methamphetamine Kg 1 & gram 885 (tablet 20,000) leh a neitu nia puh mi pali an man a, ruihhlo an manna lirthei hi hren a ni bawk.

Excise leh Assam Rifles ten heng ruihhlo neitu an man te hi R. Laltinmanga (44) s/o R. Vanlaltheuva (L), Champhai Kahrawt veng; Lalhriatpuia (34) s/o Ngaihzuala leh Joseph Lalrinmawia (23) s/o Vantluanga, Vairengte Field Venga khawsa ve ve leh Lalchawngpuii (33) d/o L. Zakapa, Vairengte Hall Veng-a khawsa nia inchhalte an ni. Heng Methamphetamine phurh kualna atana hman lirthei pahnih – Grand i10 Car (MZ05A-8395) leh Ciaz car (MZ01T-5265) pawh hren tel a ni bawk.

Methamphetamine vanga mante hi NDPS Act 1985 tlawhchhanin thubuai siamsak an ni a, 30th December, 2022 khan Special Judge (NDPS) hnenah hruai an ni.