Nimin Inrinni khan F. Sanglura band album — Chemtatrawta tih chu tlangzarh a ni ta. He album hi 'Thrash metal' atanga 'Soft rock' leh 'sentimental' thlenga ngaithla thei tan chuan bihchian bakah, phelhchian pawh a dawl khawp ang! Engineer's Club, Aizawl-ah sawmbik mi tlemte te hmaah ho danglam tak, hun heh lo tak hnuaiah Chemtatrawta album hi tlangzarh niin, he album-ah hian hla 11 zet khungkhawm a ni a. Chu'ng zingah chuan 'Nunhlui & Bahsamsei' hi hlaphuah thiam B.D-a (L) khan a boral hmain Sanglura sak atana a pek niin, BD-a hriatreng na'n tiin an dah a. ‘Valkuahlawri’ hi F. Lalthanliana (L) phuah niin amah hriatreng na'n an telh bawk a; ‘Lungphang Suh’ tih hla hi F. Lalnunfima (L) hla a ni leh bawk a, an zah leh hriatrengna'n an telh bawk a ni. Sap hla pathum awmin — ‘Hold On To My Heart’ hi PC-a (Shivaji Tilla Khatla) leh Maruata (Lunglei) te phuah a ni a, mawi an tih tlan em avangin an telh a. He'ng bak a hla dang te — ‘Long live Rock, Lam Ang Aw, Kan Zai Zel, Chemtatrawta leh Thiana tihte hi F. Sanglura band irawm chhuak vek an ni a, an kut kawih ngei maiin Zonun Recording ah an record a ni. Album title 'Chemtatrawta' tih hla hi a music video pawh hman deuh khan hmehchhuah channel a awm lai pawh khan kan hmu fo tawh awm e. He hla hi Chemtatrawta thawnthu atanga lakchhuah a ni tlangpui a. Single angin music video pawh tihchhuah a lo ni tawhin, he album-a an dah leh dawn hian recording an ti tha leh vek a. LIVE vekin recording hi an ti bawk. Chutihlaiin, Chemtatrawta hla chauh hi LIVE veka an record a ni hauh lo mai. Album-a hla awm zawng zawngte hi LIVE veka recording vek a nih avangin sound pawh a tha ham ham hle. F. Sanglura band chuan, "Chemtatrawta album ti puitling tur hian band member-te kan thawk rim hle a, sawiho leh tha zawk tur ngaihtuahin kan hmanhlel hle a. In lungrualna nen he album hi kan puitlin thei ta a ni," tia sawiin, music video hi siam nghal tura an inbuatsaih tan thu an sawi bawk a, rei lo teah local TV-ah chhawpchhuah tum a nih thu an sawi lang bawk.