Aizawl: Mi thahnem ngai te sum thawhkhawm hmangin Aizawl khawpui chhunga hripui vanga harsatna tawk te tanpuina sem tum a ni a, mi harsa te lo dapchhuak tur hian veng tina Young Mizo Association (YMA) te chu ngen tum an ni.

Covid-19 vanga harsatna tawk te chhawmdawlna atan hian tunhnai khan Aizawl khawpuia local cable 2-LPS leh Zonet te chuan vehbur an khawn a, an vehbur khawn atang hian Rs. 23,45,000 hmuh a ni a. Heng sum tlingkhawm te hi engtin nge tangkai taka hman anih theih ang tih chu tunhnai khan Aizawl DC hovin sawiho a ni a, Aizawl khawpui veng 83 ah te sem nise tih an rel.

Aizawl DC hova Fairelbel sum lut te hman dan tur ngaihtuahtu committee chuan sum lut te hi hripui vanga hna chan, natna khirh tuar, khawsak harsa leh mi inluaha khawsa te ngaih pawimawh nise an ti a. Ruahman dan chuan veng tinah Rs. 25,000 pek nise, tanpuina dawng tur te hi category A leh B ah thenin category A ah hian chhungkua/mi 2 zel awmin heng mite hi Rs. 10,000 in tanpui nise, category B ah chhungkua 1 thlangin heng mite hi Rs. 5,000 in tanpui nise an ti.