Aizawl: Mizorama vaimim ei chhetu, Fall Army Worm (FAW) chu la rem chiah lo mah se Agriculture department chuan control tawh ah an inngai.

Zalen palai zawhna chhangin Agriculture thawktute chuan FAW zualpui chu a reh tih an sawi a; mahse, khaw awm dan azirin rawn lang leh thut thei a ni tih an sawi a. “FAW chungchangah hian kan beng kan chhiin kan thlithlai reng a. Tun dinhmunah chuan vaimim bak thlai dang a khawih kan hre lo a, vaimim a khawihte pawh rawn chawrno lehin a rah leh thei a. Kan control-a kan inngaih avangin damdawi pawh kan pe chhuak tawh rih lo a ni,” an ti. Ruahtui tlak hma kha chuan FAW tana sik leh sa kha inthlahpun nan duhthusam a ni tih an sawi bawk.

Agricultute-a thawktute chuan fall army worm-te chu an inthlahpun chak em avangin control an har tih an sawi a. FAW nu pakhatin a vawi khat tuiah no 100-200-te hringin a dam chhungin no vawi 2000 thleng a nei thei a, ni 2-5 inkarah a keu avang te, chhun lamah birua zan lamah an chet thin avangin a tihrem kawngah harsatna an tawk tih an sawi bawk.

Chhinchhiah danin FAW hian Mizorama ram hectare 1267.01 nghawngin chhungkaw 10180-te a tibuai a, khaw 347-te thlai a ei chhia a ni.