Ka fapa, i nu nena nupa kawpchawi ni tura Pathian hmaa thu kan tiam atang khan nghahhlel takin i lo pian ve hun tur hi kan thir thin a, ni leh thla a liam a, kum sul a vei a, kum a lo thar leh a, nang lah i la in duh tlat mai bawk si. I nu nena kan inneih atanga kum 6-naah i lo piang a, fapa pekin kan awm ta! Kan lawm teh e. Tap chunga i la dai ngai loh khawvel eng i rawn hmuh ni khan lawm avangin kan biangah mittui a luang asin. Tunah i piancham vawi 5-na a lo herchhuak ta reng mai. He i piancham vawi 5-na a lo then hian kei i pa, mi dang leh vangtlang tana inpek kawnga pa vangtlang pawh pha lo hian fuihna thu chah duh che ka nei a. Thu chhia a tha dawngsawng thiam tur khawpin la puitling rih lo mah la vawina ka thuchah hi i hun kal zel turah i vawn reng a, i zawm tlat bawk chuan i hringnunah a tha zawnga nghawng a neih ngei ka beisei.

1. Pathian tih rawh. I nu leh i pa te hian kan dam pui reng dawn lo che a, mahni kea i din hun a la awm dawn. Pathian tihna i neih a, ama mi hriat i nih bawk chuan chu chu ralthuam tha ber a ni. I khawvel dam chhungin i hausa emaw i rethei emaw a ni thei e, chung zawng zawng aia pawimawh chu Pathian hriatna hi a ni. Khawvela nawmsak ai chuan chatuana nung tura khawvel chhuahsan theih hi a hlu ber zawk a ni. Pathian hriatna hi nun thupui (purpose in life) a neih tham a ni.
2. Bible-a Pathian inpuanna hi a chiang ber a, nangmahah dangdai tak leh maksak taka Pathian inpuanna chiang tak beisei suh. “Pathianin khawvel a hmangaih em em a, chutichuan a Fapa mal neih chhun a pe a, amah chu tupawh a ring apiang an boral loh a, chatuana nun an neih zawk nan,” (Johana 3:16) tih thu zawm mai hi pianthar nan pawh a tawk viau a ni. Bible-a Pathian inpuanna bak hriattirna dangdai deuh i beisei chuan fing vervek takin Setana a inrawlh mai ang. Rinna kawnga kalsual tam tak hi Bible-a Pathian inpuanna duhkhawp lo a, a aia chiang leh dangdai deuh duhtute an ni duh khawp mai.
3. Mi rel ching suh. Mi chanchin chhe lam tuipui tawk vela ze nawi i ni ang tih ka hlau. A êng lamin thil thir thin la, he khawvel ram zauah hian tumah mi fel famkim an awm lo tih hria la, mi tlinlohna aiin an thatna lai hmu lian fo thin ang che.
4. I kawppui tur i zawn hunah i mit mai ni lo, i beng pawhin zawng thin ang che. Chhungril thatna hnualsuat khawpa pawn lam mawinain a bual at loh nan che fimkhur a, i chhia leh tha hriatna fim tak hman tum thin ang che. Hmeichhia, chhungril thatna tlachham te hian chhungkuaah hlimna an thlen ngai lo tih hre reng ang che.
5. Zuk leh hmuam hi ti ngai suh ang che. Keini i nu leh pate pawh zuk leh hmuam laka kan fihlim a nih chuan nang pawh i fihlim ngei tur a ni. Zuk leh hmuam laka fihlim tur hian ka beisei satliah lo che a, a phutin ka phut bur che a ni. Zuk leh hmuam ti miah lo drug ngawl vei, zu ngawlvei ka la hre lo.
6. Doctor emaw, Engineer emaw, IAS emaw, Pastor emaw nih tum rawh ka ti lo. I tuina ka hre lo a, i theihna (caliber) pawh ka hre lo. Nuam ti tak leh rinawm taka i tuina ber hna i thawh theih chuan chu chu i tana ka duhthusam a ni. Chutianga i tuina ber hna thawk thei tur erawh chuan taimak chhuah thin ang che. Fapa, IAS officer, ei ru tun tun thin neih ai chuan rinawm leh taima taka hmunphiat (sweeper) fapa neih pawh a let tam takin ka duh zawk. He thu hi mawi hawiha sawi ka ni lo e. Kut tling loa sum la lut, thatpui tumah an lo awm loh vang zawka sawi ka ni. Eikuk hmang chuan thihna a zawng a ni. Bible-in a sawi vek a lawm, i awi loh chuan Solomana Thufingte kha i chhiar dawn nia.
7. Mi dang hnen atangin thilthlawnpek beisei ngai suh. Dawngtu aiin petu nih tum thin ang che. Kut dawh riltu put hi taksa piansualna tluka hlauhawm a ni.
8. Vui vai ching mi ni lo la ka duh khawp mai. Miin i chungah i beisei anga an tih loh pawhin vui vai lo hram ang che. Mi laka i vui vai fo chuan nangmah i inti hreawm thlawn mai a ni.
9. I chungah engpawh a lo thleng thei e, mahni inkhawngaih lo turin i rilru tipaukhauh ang che. Mahni inkhawngaih hi mi chak lo zia a ni a, hlawhchhamna hmahruai a ni bawk. Khawvelah hian mi vanduai ber a nih theih loh. Keini aia vanduai leh dinhmun chhe zawk hi an lo la awm ve zel mai.
10. Dawhtheihna nei rawh. Puipunnaah leh thiante zingah a dawhthei lo fal bik, a nghakhlel fal bik ni ngai suh ang che. I duh anga thil a kal lohin chi aiin phili ruai lo la, i tih theih leh i thunun theih piah lam thil tam tak a awm tih hria la, i tih theih piah lamah chuan dawhthei takin nghak ve tawp mai rawh.
11. Harsatna hian kian hun a nei thin tih hre reng ang che. I vanduai ni a lo herchhuah pawhin khawdur kian hunah ni eng mawi tak a lo lang leh thin tih hi theihnghilh ngai suh ang che.
12. I aia sangte nen i dinhmun tehin, inkhaikhin ngai suh ang che. I chantawkah lungawi la, i phak lohte leh i aia dinhmun thaa dingte avangin intilungngai suh ang che. Eng dinhmunah pawh ding la, phak loh chu i nei reng tho dawn. America President meuh pawhin venthawn tam tak a nei ve a nia.
13. Mi zawng zawng i tilawm thei lo tih hria la, nangmah lawm lo tu che an awm pawhin hnual phah nan hmang ngai suh.
14. Finfiah harsa khawpa dawta puhtu che i tawn pawhin thudik hretu mi pathum - nang, a puhtu che leh Pathian an awm reng tih hria la, chu chuan inthlamuan thin ang che.
15. Hamthatna leh tlaktlum beiseiin mi tlawn ngai suh ang che. Mi tlawn ching tak te hi dinhmun chhiat rual ruala min theihnghilh nghal tute an ni duh khawp. Mi tlawn pawh beisei suh ang che.
16. Engtik lai pawhin khawvel hi siamthat a ngai reng a, a chakna te chawpa boral mek he khawvel siamthat kawngah hian tlem te tala tha i lo thawh ve theih chuan a lawmawm khawp ang. Siamtha theitu i nih loh pawhin ti chhe zualtu chu ni lo hram ang che.
17. He khawvela thil siam ropui ber chu mihring hi a ni tih hre reng la. Kawngsira kutdawh thu mai mai pawh kha nangmah ang bawka Pathian anpuia siam, Pathian aia hnuai deuh chauh a ni asin. Chuvangin mi tu pawh an dinhmun vang ngawtin en hrang lo la. A mihring nihna, Pathian anpui a nihna kha zah thin ang che. Dinhmun hniama a din vang ngawta i hmusit a nih chuan a phena Pathian i hmusit tihna a ni chiang khawp ang.
18. Lehkhabu tha chhiar ching la, i sum leh pai dinhmunin a tlin phei chuan zin chhuak fo thin ang che.
19. Zingah hma taka thawh tum thin rawh. Boruak chhiain a la pawlh buai loh zing boruak thiang hi a man a tam teh asin. I hriselna ngai pawimawh fo rawh.
20. Hlimna hi a hranpain zawng ruai suh. I nun a dik a, thil tangkai tih nana i nitin nun i hman thin chuan i hlim em em tho ang.