March 2010 atangin kumtin buatsaih a lo ni tawh a, kumin hi a kum li-na a ni. Mizorama fashion show changtlung tak Fashion Fusion 2014 chu Zirtawp zan khan Ramhlun Indoor Stadium-ah huaihawt a ni a. He tah hian zirlai eng emaw zatin an thuam duan te an pho chhuak a. Mipui hlut pawh a hlawhin, hall khat tlatin an pungkhawm thei. Kum dang ang bawkin kumin Fashion Fusion hi fashion show satliah a ni lo lehpek! Computerised Embroidery Institute of Fashion Technology (CEIFT) tih thin, tuna Vakiria Institute of Fashion Technology (VIFT) tia a hming thlak takah hian zirlaite'n kum tluanin fashion technology an zir a, kumtin zirlai chhuakte’n an thil zir pho chhuahna atan FASHION FUSION hi an hlawhtlin pui thin hle a. Kuminah pawh a hlawhtlinna kan hmu leh e. Zirtawpni zana Ramhlun Indoor Stadium-ah 3:16 Plan Solution Fashion Fusion 2014 buatsaihah, mipui an tamin ngaihhlut a hlawh hle. He hunah hian Vakiria Institute of Fashion Technology-a zirlai 20 te’n an collection theuh an entir a. Zirlai pakhatin a collection-ah hian thuamhnaw chi nga zel an nei a, model chhe lo tak tak te’n an rawn inbel chhuak a ni. Zirlaite’n an thuam design te an pho chhuah hma, fashion show pangngai neih hma hian Aizawl Masala leh Speed, Ramhlun North-te sponsor-in Red Carpet buatsaih a ni a, hetah hian designing lama Mizo chhuanawm tak takte bakah, zaithiam leh milarte an inlan hlawm. Designer zingah hian Rinliana, Tanpuii (Zozia), Muanpuii Chinzah, Suzanne (Women Polytechnic) te niin, Vanlalsailova, Ruth (Holiday Lounge), Ngurthangvela leh John (3:16 Plan Solution) te an inlan a, hemi hnu hian fashion show neih a ni nghal. Fashion Fusion 2014-ah hian zirlai tithate hnenah award sem a ni a. An ngaihhlut ber, VIFT-a zirlaitena dawn an chak ber thin — Queen of Fashion Fusion 2014 hi Zoremmawii, Durtlang chuan a dawng a. A ni bakah Best Collection-ah F. Lalnuntluangi, Chanmari West thlan niin, Best Garment Construction-ah Vanramlawmi, Chhinga Veng; Best Creativity-ah Wimmie C. Lalbiakmawii, Khatla leh Best Craft Endorsement Siamkimi, Keitum leh Lalthanruali, Chiahpui te’n an dawng. Zirlaite  kutchhuak thawmhnaw hrang hrangte hi model-te'n an pholan hma hian endiktu mi pathum — Sapdawli, Charlie leh Mami (RB Fashion House) an awm a. Anni hi Mizo fashion khawvela tawnhriat nei tha ber pawl an ni a. Model te hmai leh sam cheitu hi Hlua Chhakchhuak (Style & Go) a ni bawk. VIFT neitu Sangzeli chuan VIFT-a zirlai an neihte an kum telin an tha tial tial niin a sawi a, “Judge te pawhin thlan thiam harsa an ti hle a, an thiam hlawm a, a thiam ber thlan buaithlak an ti hle,” a ti. Kumtin tha leh ropui zawka Fashion Fusion hi buatsaih tum a nih thu sawi lang bawkin, “Nakkumah emaw, hun leh dangah chuan India ram chhunga mite pawh sawm chhuah kan tum a. Tin, Fusion dangte nena inelna leh thawkho a, buatsaihhote pawh kan tum a. Amaherawhchu, hmun tam takah hian Fusion show hi mumal taka buatsaih a ni lo fo a, chutihrual chuan kan hmachhawp lian tak chu a ni hrim hrim,” a ti. Vakiria hi Mizo hmeichhiate incheina thlak danglam thei khawpa thiltithei an ni! Tuna Fashion Fusion an buatsaiha an zirlaite hi batch 5-na niin, Vakiria Institute of Fashion Technology atang hian mi 120 chuangin an zir chhuak tawh a. Heng zirlai, Diploma zirte hian an zir tawp dawnah thuamhnaw chi hrang hrang design-in, Fashion Fusion-ah hian hak chhuah a ni thin. VIFT hnuaiah hian zirlai thahnem tak an lo zir chhuak tawh a, heng zinga mi thenkhat hi chu ram pum huap pawha hlawhtling chhunzawm, eizawnna kawngah leh Mizorama hmeichhe thawmhnaw design leh thui kawnga hriat hlawh takte an ni.