Mizoramin Lok Sabha seat khat kan neihna tura inthlan chu tluang takin kan zo a. Political party hrang hrangten theihtawp an chhuah a, candidate-te pawh an awm mai mai hman lo. Party hrang hrangten mi hmingtha candidate atan an vawrh chhuak hlawm a, chutih karah ram leh hnam aiawh tur an nih miau avangin mi mal nun inchhui loh theih a ni lo a. Heng zingah hian Zoram People’s Movement (ZPM) candidate chu hun kal tawha thil thleng vangin beih tawk nasa ber a ni awm e.

ZPM candidate hi MAMCO eirukna thila inhnamhnawih leh Hnahlan grape chingtute hnen atanga an sum hmuh tur 35% laksaka puh a ni a. Inthlan campaign laiin a lar hle a, inthlan zawh tawh hnuah ZPM candidate hian April 22, 2024 khan an party office-ah thu sawiin 35% lak a nih chhan chu Mizoram sawrkarin state matching share 25% thawh tur a neih loh vang niin a sawi a. 35%-ah hian state matching share leh thil dang, mutia man bakah senso neuh neuh a tel vang niin a sawi a. ZPM candidate insawi fiah hnu hian he thu mu hnu deuh tawh hi sawi thar leh a ni ta a ni.

Hetih lai hian khatih laia Hnahlan lam bialtu, Champhai North bialtu MLA chuan Congress hun laiin state matching share pek theih loh an nei ngai lo nia sawiin Hnahlan grape chingtute tan pawh MIS chungchangah harsatna awm ngai lo niin a sawi ve thung a. Mizoram Rajya Sabha hlui pakhat pawhin grape chingtuten MIS atanga pawisa an hmuh theihna atan hian sawrkar laipuiah theihtawp a chhuah thu a sawi ve bawk.

Sawrkar laipui hian agriculture leh horticulture hnuaia kuthnathawktute chu an thlai tihralna leh hralhna kawngah harsatna an tawh chuan tanpui theihna, minimum support price a siamsak a. Chu chu a tawi zawngin Market Intervention Scheme (MIS) an ti a, Department of Agriculture & Cooperation, Ministry of Agriculture & Farmers; Welfare hnuaiah dil theih a ni.

Tunlaia sawi hlawh tak, Hnahlan grape chingtute harsatna phuhru tur hian MIS hnuaiah hian Rs. 3,70,35,000 pek chhuah a ni a, heta tanga consultant-in 35% a la nia sawi lai tak hi inhnialna chawk chhuaktu chu a ni ta a ni.

Mi thiamte sawi dan chuan Mizoram sawrkara finance department chuan consultancy firm-te hian project an buaipuinaah (DPR siamna leh buaipuina senso) atan nuai 100 hnuai lamah 2% leh nuai 500 hnuai lamah 1.5% an lak a phalsak a. Chuti a nih chuan finance department thuchhuak ang chuan Hnahlan grape tana vaibelchhe 3.7 sanction-ah hian 2% emaw lak tur a ni a; mahse, 35% lak a ni ta hian sawi a ti tam ta a ni ber.

India rama project hrang hrangah hian sawrkar laipui leh state sawrkar hian zat leh zat (50:50)-in an intum sem thin a, hmarchhak state-te erawh ngaihhnathiam niin project azirin 75% chu sawrkar laipuiin tumin 25% chu state-in an tum ve thin a ni.

Hetih rual hian Hnahlan grape chingtute an khawngaihthlak hle mai a, an tan chuan an leiba tlingkhawm, phurrit tak maiin a delh mek laka chhanchhuaktu an mamawh a. Bank atanga loan ba an neih te, grape leina ba tlingkhawm rulhan tura hmala theitu apiang chu thawhpui an duh ngei ang.

Tuna thu inchuh lian ber ni ta chu Mizoram sawrkar hian Hnahlan grape chingtuten MIS atanga sum an hmuh theihna atan hian state matching share 25% hi sawrkar sum atangin pek a ni nge ni lo tih hi a ni a. Hemi hrechiang ber tur chu finance department an ni.