Tuipuirala khaw hlun ber pawl leh khaw lian zinga mi Khawbung YMA President T. Laltlanfela chuan Myanmar leh Mizoram inrinna khua, Tuipuiral khua ho ah chuan Kuhva lakluh hi an kalpui deuh vek thu a sawi. T. Laltlanfela chuan Khawbung khaw bik chungchang a sawinaah, “Sipai leh Police lam hian check gate te pawh nei ve bawk mah se, motor te tan a helna kawng a awm zel avangin inman hi a awm meuh lo. Police an ni emaw, sipai an ni emaw mihring hi an indaih lo hrim hrim bawk,” a ti.

Kuhva rawn luh dan leh khawtlangin an hlawkpui dan a sawi naah Khawbung YMA president chuan, smuggling thil a ni chungin khawtlanga mi harsa te tan inhlawhna tha tak a nih thu leh lirthei neite tan pawh inhlawhna tha tak a nih thu a sawi. “Sawrkar lam atangin inhlawhna mumal a awm thei lo a, hetianga inhlawhna a awm hi kei chuan tha ka ti viau mai. Keini khua angah hi chuan he sumdawnna a inhnamhnawih hi kan awm hranin ka hre lo a, inhlawhna tak tak a ni satliah mai. Dan phal loh a ni chunga hetianga Mizoram khawchhak kil atanga phai thlenga a tlang theih hi a mak zawka chu a ni,” a ti.

Tunhnai deuh atanga khan helai bawra Kuhva sumdawnna hi Custom lamin an rawn veh ruk avangin a chawl deuh tih T. Laltlanfela chuan a sawi a, a phurtu lam pawh an reh deuh rih thu a sawi. Samtlang pa pakhat pawhin ZALEN a hrilh danin an khuaah truck 30 rualte an rawn thlen thin thu leh kuhva thiar thin mutia association hial te pawh an awm thu a sawi ve bawk.

Tuipui ral khua a thudawnna pakhat chuan Kuhva tawlhruknaa inhlawh chu a hlawk hle thu ZALEN a hrilh bawk a, zan khatah cheng 3,000-te an hlawh thei a, thil danga chhawr tur hlawhfa tur pawh an van phah niin a sawi a.

Zan chu an chet lakna hun a nih thu a sawi lang tel bawk. Kuhva hi Myanmar lam atangin zanah an thiar kai a, hei hi pick-up hmanga phurh khawm niin, kawng hran hran an zawh thin a, check gate pelhah motor lian-ah an inhlan fel mai thin niin a sawi.

Kuhva hi trip khat cheng nuai 30 niin thudawnna chuan a sawi a, a leitu te hian nuai 2 vel chu an hlawh thin dan nia an hriat thu a sawi, heng kuhva leitute hi Aizawl, Champhai leh Lunglei sumdawngte nia an ngaih thu leh sum hrawm a nat em avanga leh smuggling thil a nih miau avangin a inrawlh te hi sumdawng ngawt ni lo, thil ti thei tak tak an tel a rin thu ZALEN a hrilh.