Association for Environmental Preservation (ASEP) chuan sava bu siamchawp, artificial nest kum 2008/2009 vel atang khan kalpui tanin bawm 1,500 atang 2,000 vel an dah/sem chhuak tawh a. Heng sava bu siamchawp hi savaten chhawr tangkaiin hriat theih chinah sava tuak 300 chuang chu tha takin an chhuak tawh.

ZALEN-in ASEP President K.Lalmuansanga hnen atanga thu a dawn danin artificial nest an enkawl (monitor) hi an siam atanga chhutin 2% emaw lek chauh a ni tiin a bak zawngah pawh khan hetiang tho hian hlawhtlinna duhawm tak a awm an ring tih a sawi a. Artificial nest-ah hian an hmuh leh hriat theih chinah khawmual chinrang, vatelal, vapaw, chhimbuk ten no an nei tih a sawi a. Artificial nest chu a tangkai em avangin dah chhunzawm zel an tum a, sum leh pai nei deuh ni phei sela chuan hei aia nasaa kalpui hi an châk tih a sawi.

ASEP mission pui ber chu mipuite rilrua nungcha humhalh pawimawhzia zirtir, ‘awareness campaign’ a ni tiin, “A tam thei ang bera Zoram dung leh vanga kalpui hi kan tum ber chu a ni a. Kan hmalak tawhna hi kum 20 chhung zet a lo ni ve ta a, a tlangpuia chawhrualin kum tin activity hi 30 chuang vel chu kan nei ziah a. Awareness campaign, seminar, rally, artificial nest box, consultation meeting, etc. tih vel kan nei ve deuh reng a ni,” a ti.

Mizoramah state dang/ram danga awm ve lo nungcha a awm leh awm loh zawhna chhangin ASEP president chuan, “Mihringin kan siamchawp ramri hi nungchate ramri a ni ve lo a, Mizoram pawh hi biodiversity zawnga sawi chuan range ang zawnga dahin Indo-Myanmar range chhungah kan awm a. Chu range chu biodiversity hausakna hmun ni si, dinhmun derthawng taka awm lawi si zingah a tel a. Chuvangin, Mizoram bikah hian ram danga awm ve lo han tih fak tur bik chu kan ram a zim em avangin sawi ngam a har a. Mahse, khawvel hmun danga vâng tawh nungcha erawh kan nei nual a, chung zingah chuan samang, hauhuk, dawr, kelral, etc. tih velte hi ram dangin an awh em em an ni,” a ti.

Nungcha tihlum thinte hremna dan, The Wildlife (Protection) Act, 1972 chu dan tha tak ni mah se a kenkawhna lamah an pachhe thung tih sawiin, “Kum 20 chhung hemi lam buaipuia ke kan lo pen ve tawh chhung hian thil siam dangte tana JUSTICE hi ka la hmu meuh lo niin ka hria a. Dan ang taka rorelna kalpui nise chuan kum 2/3 chhung lek pawhin hmasawnna sang tak kan neih ka ring,” a ti bawk.

Artificial nest box-ah chu savate inhumhimna a ni tih sawiin, “Savaten an hriat fuh laklawh tawh chuan an tan a him a, thlipui, ruahpui, rial leh hmelma dang lak atang pawhin inhumhimna tha tak a nih avangin an lawi tawh chuan an duh em em a. Mi tinte hian ngaihtuahna thar puin kan compensate ve nan kan sum tlem emaw, kan hun tlem emaw pe phal ila a tha mang e tih hi kan duhthusam ber a ni,” a ti bawk.