Aizawl hmun hrang hrangah zan lamah inzuar an awm thin a, Pathianni chhunah pawh kawng lun laiah chhun lama inzuar an awm thin bawk, tam tak tan sum lakluhna tha tak a ni. Mahse, hun eng emaw ti lai atang khan chhun lama inzuar hi veng thenkhatah chuan phal a ni tawh lo a, zan lam inzuar te pawh hun bituk awma inzawrh tir an ni. An phal loh chhan lian tak chu mi awmtha duh lo, addict kan tihho vang a ni ber.
Pathianni bikah hian Aizawla kawn lun laiah tun hma deuh kha chuan hmawm sawm leh puarna lam thil zuar hi an awm thin a, heng inzuar te hi lun pawh an lun thawhkhat hle; mahse, tunah chuan heng thil zuar te hi hmuh tur an awm ta meuh lo a, a chhan chu khawtlang hruaituten an veng huam chhungah thil zawrh an phal tawh loh vang a ni. Zan lamah pawh veng hrang hranah kawng sira inpho hmuh tur ang kha an tam ta lo hle a, zan reia inhnawhpuarhna pawh a awm ta meuh lo a, heng ho hian mi chi hrang hrang an ko khawm lo thei lo a, an zinga mi hnawksak an awm loh theih loh avangin veng chhung mi tan hnawksak an nihna chen a awm thin.
Kawngsir remchang laia inzuar te piah lamah tun hnai deuh atanga khan lirtheia eitur zuar an rawn lang chho a, heng ho dawra thil ei pawh hi kan intihhmuh hman viau a, a dawrtu lam hian facebook leh whatsapp lamah pawh an thil ei lai thla an dah hmuh tur a awm ngun hle. Comment lamah pawh hetiang 'food truck' a awm ta hi tha titu an tam thei hle a, zan rei riltam tawh lama hetiang dawr tur an awm ta hi lawmawm an ti thu te an ziak hlawm. Tam tak chuan hmasawnna pakhatah an ngai hial a, ei zawn dan kawng leh kan hnathawh hun te a danglam chhoh tak avangin tangkai ti fe fe pawh an awm bawk.
Damlohna avanga te, chhiat tawh vanga veng kar hla tak taka loh theih lova kal te tan zana dawr tur nghet tak an awm hi thil tul anihna chen pawh a awm. Zan lama lirtheia sumdawng tam tak tan heng dawr awm te hi malsawmna tih ngam a ni a, Zin veivak khawpui chhung zan reia thleng te tan inhnangfakna tha an tling.
Tun hnai khan Aizawla food truck hmanga zan lama sumdawnna kalpui tan tu chuan, hemi atana hian sum tham tak a seng tih a sawi a, ani hian puk chawp tak meuhin tun hi a thleng tih pawh a sawi. A sumdawnna hi tih chi viau turah pawh a ngai hman, mahse, a beisei angin he sumdawnna hi a chhunzawm thei dawn ta lo a, dawrtu a ngah ber lai, zan dar 11 leh dar 1 inkarah te an inhawng theih tawh dawn loh avangin a buai hle a, zan dar 10 vel bak a inzawrh phalsak a nih tawh loh avangin, engtia kal zel tur nge tih pawh hriatthiam harsa a tih thu ZALEN a hrilh.
Heng dawr kai ho te zan rei thlenga an inhawn phalsak an nih loh chhan hi a tam teh chiam lo a, Pathianni a inhawn phal loh chhan hi chu engdang ni lovin Pathianni a inzawrh rem an tih loh vang a ni ber a, zan lam inhawn phal loh chhan hi chu drug addict leh KS kan tih ho te an huangtau phah tih a ni deuh ber.