Tunlaia khawpuia kan uar em em, inneih ni khua leh birthday lawm nikhuaah kan intihhmuh chhoh mek, catering hi a ruaitu tan thil awlsam a ni tih piah lamah mi tam tak tana eizawnna siamsakna a lo ni tel bawk a, he thil hi kan chhunzawm zel dawn pawh niin a lang a, kan ni tin eizawnna kawngah hun kan nei lo hlawm tawh bawk nen, thil remchang tak pawh a ni.

Tunhma kha chuan eikhawm pui tham deuh buatsaih a nih dawn chuan a hma ni hnih vel atangin buai a ngai thin a, bungraw lakkhawm mai bakah sa leh chawhmeh tur dang thlaite lakhawmin buai fe a ngai thin a; tin, fatu tur insawmkhawm a la ngai a, fatu turah pawh ei leh in lam siam thiam leh chaw chhum thiam bik te sawm an la ngai zel a, hengho hi mi hman lo tak takte an ni thin a, a sawmtu tan pawh inthlahrunawm tak takte an ni.

Fatu tur hian chhungkhat hnai, a bikin makpa te chu kan ruat fo a, makpate kutah thil thui tak kan dah thin. Heti a nih chuan kan inneih ni-ah leh kan birthday lawmnaah te chuan kan lamhnai tam takte chu a lawmnaa an tel thei lo fo a, chawhlui kilho tur buaipuiin an hmanhlelh a ngai tlat a ni. Inneihnaah kan makpate chhung chu thlalaknaah an kim thei lo nghal pang. Mi nalh taka an inchei laiin kan makpate chu hnathawh kawr nen an awm a ngai tlat; mahse, catering kan tih thin takah chuan heng zawng zawng hi kan pumpelh thei ta a ni.

Tun hnaia a unaute inneih buaipuitu, Lawmkima chuan a nupui neih dawn leh a nau nupui neihna buaipui chu thil a awlsam hleihzia ZALEN hrilhin, “Kan inneih dawn kha chuan ei siamna tur bungraw hawhkhawm ringawt pawh kha hautak a tling. Bawng talh leh vawk talh bakah chawhmeh dang buaipui tur ringawt kha tha tam tak sen a ngai. Tin, a tuk lama senghawi leh hmarua pek leh pawh kha hna tak tak a tling a ni. Catering kan ti hi chu a awlsam ta lutuk a, buaina tur hi a awm tawh lo tih theih a ni a, he thil kan tichhuak hi chu mi zawng zawng tan hian a awlsam a, tul lova hun khawral kan pumpelh bawk a ni,” a ti.

Lawmkima te makpa pawhin, “Catering koh tur awm ta chu thil a awlsam phah,” tiin, nupuite chhungkaw thil tihnaah pawh nalh takin an tel ve theih phah tawh. “Tunhma kha chuan nupuite chhungaw thiltihnaah kha chuan hnathawh thuam nen khan awm a ngai thin a, tunah chuan nupuite bulah engthawl takin a awm theih tawh a ni,” a ti.

Chutihrualin anni lam chuan catering chu mahni rawng inbawl nen chuan sum sen chu a inthlau thu ZALEN an hrilh a, mi tin mila rate hrang hrang siam theih ni se tha an tih thu an sawi. Hei aia rate tlawm deuh zawka tih theih ni se an duh thu an sawi bawk. Catering lam hian an thil chhawpchhuah tawh chin chu a bang hawn lovin a order-tute hnenah pe thin se tha an tih thu an sawi bawk a ni.