Tunlaia Mizorama sumdawnna fuh tak nia sawi chu mi ei in tur siam a, ei theih tura chhawpchhuah, Catering tia kan sawi mai hi a ni. He sumdawnna hi a hre chiang te chuan an hlawkpui hle niin an sawi a, tha erawh a mamawh hnem a, hah pawh a hahthlak ruaipui siam tur phei chuan a thawh pawh an thawkrim thin hle. Rawngbawl lawk a ngaih thin avangin hmingchhiat chang te pawh a awm a, chu tih rualin fak hlawh chang a tam ve hle bawk.

He sumdawnna luh chilh tur hian license erawh neih a ngai a, Health Department hnuaih registration hi tih a ngai a, tuna catering buaipui lian ho hi chuan an nei deuh vek niin Food & Drugs lam chuan ZALEN an hrilh a, he sumdawnna buaipui zawng zawng hi chuan phalna an neih leh neih loh a hriat loh thu an sawi thung.

Catering te siam, ei leh in tur an siamna hmun chungchangah sawi leh sel tam tak a awm niin a lang a, an hmun hian duhthusam tawk lo niin ZALEN hian thu a dawng thin. Food & Drugs lam chuan hetiang lamah hian buaina a awm lem lo niin an sawi a, endikna an kal pui tam takah hian an hmun leh hma chu thu tha tawk niin, an sawi. Heng ei siama sumdawng te chawhmeh chhawpchhuah hi fuh tawk lo chang te pawh a awm thin.

Mi sang tam tak ei tur te a nih avangin a hma ni atang te, a hma zan atang ten buatsaih lawk a ngai thin a, hei vang hian a bik takin sa lam hi a fuh tawk loh chang a awm thin. Tin a hma zan lama siam te a nih avangin a thing chan te pawh a chang lo thei lo a, sawisel te pawh an tawk fo. Food & Drugs lam chuan hetiang thilah hian complaint an la dawn loh thu an sawi a, mipui lamin na chang an hriat loh vangah an ngai thung.

Heng catering ho thil siam hi a hrisel tawk em tih leh ei atan a him em tih erawh an endik sak ngai lem loh thu Food & Drugs lam hian an sawi a, chutih rualin heng an hnuaia inziaklut, license an pek te hi chu training te an pek thin thu an sawi thung. Hygenic practice te an neihpui thin mai bakah environment lam ngaihtuahna avangin disposable hi hmang lo turin an hrilh thin thu ZALEN an hrilh. Catering ho hnenah hian 'mipui hrai' an ni tih hre reng turin an hriattir thin thu an sawi bawk.

Food & Drugs lam hian kawngsira eitur zuar thin ho (street food vendor) pawh hi survey neih a, training pek an tum tih an sawi a, anni pawh hi license nei vek tura hmalak an tum a, phalna neia kawng sira ei siam hi za dawn an awm tawh a ni.