Mizote hi kan pi leh pute chu mei zu nasa thin an ni a. Mipain vaibel an zu a, hmeichhiain tuibur an zu bawk thin. Hetia mei an zuk nasat chhan hi thosi leh vaihmite kara hnathawk an ni a, chung rannungte umbo nan chuan an zu ni berin a lang a. Mei zu ngai lote pawh mei zu turin an ti zawk hial thin. Mei zuk that lohzia leh taksa a nghawng pawi theihzia an hre lo niin a lang.

Thiamna a sang zel a, mei zuk that lohzia leh natna chi hrang hrang thlentu a nihzia mi thiamten an hmu chhuak chho zel a. Kan natna thahnem tak hi zuk leh hmuam vang a ni tih hre chhuak chho zelin Mizoramah ngei pawh zuk leh hmuam that lohzia tlangaupuia hma la pawl an awm chho zel a. An hmalakna hian rah tha a chhuahin mi tam takin zuk leh hmuam an sim phah a ni.

Mahse, tun hnaiah mei zu thin mi tam tak chuan a taka mei zuk ni chiah lo, E-cigarette zuk an uar thar hle a. E-cigarette hi vape/vaping tiin an ko bawk.

E-cigarette-ah chuan meikhu aiah a zu tu chuan meikhu/tui (vapor) a hip lut a, chuvang chuan e-cigarette zuk hi ‘vaping’ tiin an ko thin.

Solution pakhat, tui anga awm, e-liquid an tih chu atomizer (tui hu leh meikhu siam thei device)-in a tisa a, a khu chu tuihu, boruak leh vapor angin a lo chhuak a ni.

E-cigarette-te hian chemical hlauhawm tak tak heng - acetaldehyde, acrolein leh formaldehyde te hi a tichhuak a. Hengte hian chuap natna leh lung natna te a thlen thei a. Acrolein an pai tel bawk a, chu chu hnim hlo anga an hman thin a ni.

E-cigarette-te hi India chuan ‘The Prohibition of Electronic Cigarettes (Production, Manufacture, Import, Export, Transport, Sale, Distribution, Storage, and Advertisement) Act, 2019’ hmangin akhap a. Dan bawhchhia chu kum khat thleng lungin tantir emaw Rs. nuai 1 thleng chawitir emaw, a pahniha hremna pek theih an ni a; mahse, Chinese vaping brand hrang hrang - IGET, Vapesoul leh DYB angte hi awlsam takin kan nei thei leh lawi si a ni.

Mi thiamte sawi danin E-cigarette-te hian nicotine an pai tlangpui a, chu chu ngawl vei awlsam tak niin thluak thlengin naupangah leh thangtharah a nghawng thei a. Hei bakah chuap tha lo leh thawk lama buaina a thlen a, cigarette pangngai zuk avanga second hand smoke kai aiin a hlauhawmna chu nep deuha ngaih ni mah se e-cigarette khu second hand a lo hip hi a hlauhawm tho a ni.

E-cigarette control-na dan hi ram leh state hrang hrangah a inang lo hlawm hle a, rualkhai leh awmze nei leh hlawk zawka neih dan turin inhnialna a tam hle.

Mei zu nasa tak, a hnua E-cigarette zu thin pakhat chuan kum khat chuang e-cigarette a zu tawh tih sawiin mei pangngai ai chuan a tha fe zawk nia a hriat thu Zalen a hrilh a. “A hmanrua hi Rs. 2,500 atanga Rs. 3,000 velin lei theih a ni a, ka tan chuan mei zuk aiin a hautak loh bakah ka hmel pawh hi mei ka zuk lai aiin a êng zawkin ka hria a ni,” a ti a. E-cigarette chu khawchhak lam atangin chah chawp a ngai tih sawiin a rim (flavour) chi hrang hrang a awm niin a sawi bawk.