Mizoram sawrkar, Federation of Mizoram Government Employess & Workers leh Blue Mountain Construction Engineering & Services Pvt. Ltd. tangkawp chuan Federation Enclave Housing Complex siam tumin hma an la mek a, tunah hian company lam hian a bultanna atan building pahnih chu Ainawn vengah an sa mek a ni.

He project hi Mizoramah a vawi khatna tur a niin project hawnna hi July 15, 2022 khan Chief Minister Zoramthanga hova neih a ni a, in lei duhte chuan an in man atanga 10% pe lawkin hauh theih a ni a. In hi room awm dan azirin a man a inang lo a, book hmasate chuan duh an thlang thei dawn a ni.

In hmun hi sawrkarin a pe a, ruahman dan chuan in 344 sak tum a ni a; parking, hall leh dawr lian te awm tura ruahman a ni.

Federation of Mizoram Government Employess & Workers ziaktu lian, J.Ramdinmawia chuan, “Sawrkarin quarters a neih tam tawk loh avangin sawrkar hnathawkten harsatna kan tawk nasa a. Sawrkar chu quarters tam zawk min ruahmansak turin kan ngen a; mahse, an tan a harsat avangin ram min peka a satu tur zawng mai turin thu min rawn a. Chumi hmang chuan builder-te biain hma kan la ta a ni,” a ti.

J.Ramdinmawia chuan, “Ram hi kum 99 chhunga hawh (lease) tur a ni a, tui leh êng min pe dawn bawk a, keini tan chuan tha hle turah kan ngai a ni,” a ti bawk.

Blue Mountain Construction Engineering & Services Pvt. Ltd. Chairman & Managing Director Er. Partha Phukan chuan in (flat) chu a len dan azirin a man a inang lo dawn tih a sawi a. “Kan ruahman dan chuan building 8 leh community centre pakhat sak kan tum a, tunah hian building pahnih kan sa mek a. Sawrkar hnathawkte atanga booking ti azirin kan ruahman ang zat hi kan sa thei dawn nge dawn lo a la hriat loh a, a vaiin building-te hi kum thum leh a chanve chhunga sak zawh vek kan tum a ni,” a ti.

Er. Phukan chuan in (flat) chu luah hawh ni lovin lei tur a ni tih sawiin tuna leitu chuan a duh chuan a tu leh fate a chhawmtir thei dawn a, chubakah hmun danga awm a duh chuan a hralh thei dawn niin a sawi bawk.

Federation Enclave Housing Complex hi sawrkar hnathawkte tana ruahman a ni a; mahse, zawh a nih atanga thla ruk chhunga an luah loh chuan mi dang hnenah hralh theih a ni dawn a. Sawrkar hnathawkte tan State Bank of India, Mizoram Rural Bank leh Mizoram Cooperative Apex Bank chuan loan an buaipuisak dawn nia thudawn a ni bawk.