Sawrkar laipui chuan kum thar tuk mai, January 2, 2024 khan Mizote tana thu thinthawng tak mai a puang a, chu chu Free Movement Regime (FMR) tihtawp tum a nih thu leh India leh Myanmar ramri hung tum a nih thu hi a ni.

He thil hian sawi zui a hlawh a, Myanmar ramri neitu, a bikin Mizoram leh Nagaland mipuiten an duh lo zual niin a lang.

India leh Myanmar hian ramri km 1,643-a thui an intawm a, chungte chu Arunachal Pradesh (520 km), Nagaland (215 km), Manipur (398 km) leh Mizoram (510 km) te an ni a, heng ramri hi Assam Rifles-in an veng a. Ramri hian hmar lamah China ram thlengin chhim lamah Bangladesh a thleng bawk a ni.

FMR hnuaiah hian ramria khawsate chu VISA ngai lovin ramri atanga km 16 thleng zalen taka veivah phalsak an ni a. He dan hi kum 1970 khan siam niin kum 2016 khan ennawn niin kum 2018 khan India Act East policy mil tura her rem leh a ni a. Amaherawhchu, Covid-19 len lai khan tihtawp lailawk a ni.

Free Movement Regime hnuaiah hian ram pahnih thuneitute chuan visa ngai lovin kum khat chhung dam tur phalna an siamsak a, hemi hmang hian zalen takin phalna neite chu an zin thei a. Vawi khat zin hian kar hnih thleng an châm thei bawk a ni.

FMR vang hian ramria chengte zalen takin an insumdawn tawn thei a, nupui pasal innei tawnin hnam khatte chu kût ni vang thla pawh an hmang ho thei a ni.

Hetia sawrkar laipuiin FMR tihtawp a tum chhan langsar tak nia ngaih theih chu Manipur state nawrna vang a ni a. Kan hriat angin Manipur-ah chi leh chi inkar buaina chhuakin thi leh hliam pawh an tam hle a, Meitei leh tlang mite inkar buainaah hian a bul tumtu chu Myanmar atanga pem lutte niin Manipur sawrkar chuan a puh a. Manipur Chief Minister N.Biren Singh chuan September, 2023 khan FMR hi titawp turin na takin sawrkar laipui chu a lo nawr tawh a ni.

Hei mai bakah Myanmar atang hian ruihhlo, dan phal loha bungraw tawlhruk, dan lova India-a pem lut leh hel pawlte veivahna a awm nia hriain ramri hi hung turin sawrkar laipui chu a ngen bawk a ni.

Report tar lan danin February, 2021-a Myanmar sipaiten sawrkar ding lai paih thlaa thuneihna an chan hnuah raltlan mi 40,000 chuang Mizoramah lutin mi 4,000 vel Manipur-ah an lut niin tarlan a ni a. Heng mite hi Kuki-Chin-Zo hnam niin heng mite hi Manipur sawrkar chuan a ngaimawh hle nia tar lan a ni bawk.

FMR hi tihtawp a nih chuan unau leh chhungkhat intlawhpawh a harsa tawh ang a, sumdawnnain nasa takin a tuar ang a. Hei bakah eng emaw harsatna thlen palha tlanchhiat leh intuamhlawm a theih tawh dawn lo va, kum 1966-a Mizoram buai vanga mi tam tak sahimna zawnga Burma-a an tlanchhia te, kum 2021 Myanmar buai vanga mi tam tak Mizoramah an raltlan ang te kha a theih tawh dawn lo va. Hnam khat, chi khat; mahse, ramriin a then hran vanga awm hrangte kan inpawh thei tawh dawn lo va, hei hian nasa takin kan inunauna hi a nghawng ngei mi thiamte chuan an ring a ni.