Kum 1980 hnu deuh atangin Aizawl-ah gas kan hmang tan ve a. A tir chuan gas agent 4 - Mizofed, Vanbuangi, Biakkungi leh Suakchhunga te chauh awmin consumer-ten an semna hmunah kan pan thin. Gas thleng a tlem a, a chang chuan tlaivar deuh thawa gas chân ngai a awm a. Chanchinbuah pawh gas thlen hun, an sem hun, report theih hun tihte chhuah a ni thin.

Hun a kal zel a, hmasawnna avangin kawng a tha a, gas lo lut pawh a tam ve zel mai bakah kan ram chhungah ngei a thun chhawnna (bottling plant) chu Mualkhangah hial din a ni ta. Tun hma lama zan khua emaw, zing hma tak tak emawa gas la tura gas agent kan pan thin kha a bo ta a, veng hrang hrangah hmun remchang laiah point siamin gas sem a ni ta a. Hei mai ni lovin mahni inlum ngeia dawn theih (home delivery) turin sawrkar chuan ruahmanna a siam mek.

Sawrkar ruahman dan chuan September 2019 atang hian Aizawl khawpuiah chuan a duh tan gas home delivery tih tan a tum. Home delivery hi phai lamah chuan kalpui a ni a; mahse, tlangram leh gas thlen that lohna hmun, Mizoramah hian a taka kalpui chi a ni an em? A hlawhtling ve ang em tih chu hunin a hril ang chu. Mizofed thawktute chuan sawrkarin gas home delivery a kalpui tur chu a hlawhtlin theihnan hma an la mek tih Zalen an hrilh a. Ruahmanna atana lo inzirlawkna atan veng pahnih ah te August thla chhung hian kalpui chhin an tum tih an sawi a; mahse, kawng chhiat vanga supply a awm that loh avangin an ruahman angin thil an kalpui thei lo tih an sawi.

Mizofed thawktute chuan sawrkar ruahmanna chu a taka kalpui chhin phawt loh chuan tih theih a nih dawn leh dawn loh a la sawichian theih loh tih an sawi a, Mizoram chu tlangram anih avangin phai te nen chuan tehkhin chi a ni lo tih an sawi bawk.

Mizoram Consumers Union hruaitute chuan gas kan lakin home delivery charge kan pek tel tho avangin leh subsidy a luh that loh avangin dan anga felfai zawka a kal theih nan home delivery hi kalpui turin sawrkar an ngen tih Zalen an hrilh a. Hei hi tihhlawhtlin a nih chuan a bikin thingtlang lama subsidy lut tha loten an chhawr tangkai zual an rin thu an sawi bawk.

Zalen thudawn danin home delivery atan hian internet online, sms leh phone hmangin tih theih a ni a. Tuna harsatna awm thei chu supply a hnianghnar loh avangin consumer te duh hunah tak an pe thei ang em?

Veng mawng leh step thui tak tak kal ngai chi ah a theih ang em? Veng karkik tak taka pe turin lirthei leh mihring an indaih ang em tih bakah zawhna tam tak a awm thei awm e. Tun dinhmunah veng hrang hrangah gas semna point siam a ni a, hemi atan hian consumer ten Rs. 25 zel an chawi a. Home delivery rate tur erawh bithliah fel a la ni lo thung.

FCS&CA Department chuan Mizoram-a eirawngbawlna Gas man leh subsidy pekchhuah zat tur a bithliah tharah chuan Vairengte-ah Rs. 769.43/- niin hmun dangah chuan Rs. 778/- a ni ang a, bur khat ah hian Subsidy Rs. 286.46 zel pek a ni ang. Commercial Cylinder Kg. 19-a rit bur khat man chu Rs. 1442/- a ni thung ang. Eirawngbawlna Gas man thar ang hian Domestic Cylinder-ah chuan Home Delivery a hralh dawn chuan Rs. 7.53 belh zel tur niin Showroom a hralh dawn erawh chuan Rs. 18./- zel paih thung tur a ni a. Showroom rate hian RGGLV Distributor te a huam lo thung.