ZALEN July 23, 2023 : Hnahlan leh Champhaia grape chingtu pawl intelkhawmte chuan kumin atan kuthnathawkte grape an lei tan leh tawh a. Society pahnihte hian kuthnathawkte grape thar zawng zawng lei zawh vek an tum.

Hnahlan Grape Growers & Processing Society chuan July 7, 2023 atang khan grape hi an lei tan a, an lei tan ni hian qtls. 50 vel leiin July 14 leh 15 khan an lei chhunzawm leh a. Grape hi kg-ah Rs. 60 zela leiin a man pawh an pe nghal zel a ni.

Champhai Grape Growers Society pawhin a tum khatna atan July 11, 2023 khan an lei tan a, Ningani khan a tum hnihna atan an lei chhunzawm leh a ni.

Grape society hruaitute chuan kum dang aiin kuminah grape thar a tlahniam dawn nia an hriat thu ZALEN an hrilh a. Grape thar a tlem chhan hi a chawr laia ruahtui a hmuh that loh vang niin an sawi a. Hnahlan leh a chhehvelah chuan grape qtls. 1,200 vel thar an beisei a, kum hmasa lama thar zat an pha dawn lo niin an sawi bawk.

Grape tui hralh kawngah harsatna an tawk nia sawiin society hotute chuan, “Sawrkarin grape vendor a thlan fel har avangin hmalak mai theih a ni lo a. March thla velah vendor tur mi 40 a thlang fel a, hemi hnuah pawh tam tak chuan dawr an la hawn mai loh avangin kan hralh thei lo a. Vendor mi tlem tê chauhin an zawrh theih avangin grape tui kan hralhna hi thla khat vel emaw chauh a la ni a. Kan tum anga kan la hralh theih loh avangin grape tui kawl hi kan la nei nual a ni,” an ti a. An hralh ve zeuh zeuh reng tih erawh an sawi bawk.

Grape hi tun dinhmunah a nawlpui a la hmin lo a, a hmin hmasa chu society hian an la tan a. Grape hmin vanglai chu July thla tawp leh August thla tir lam a ni a. Hnahlan leh Champhai winery-te hian grape tui sawr sa, tanky a dah sa eng emaw zat an nei mek. 

Hnahlan Grape Growers & Processing Society grape siamchhuah hi ‘Isabella’ tih hming vuah a ni a, Champhai Grape Growers Society siam chhuah hi ‘Champwine’ hming vuah a ni.

Champhai Grape Growers Society hian Mizoram Baptist Church nen inremna siamin an grape tui hi sacramental wine-ah hralh a ni a, hetih lai hian Hnahlan Grape Growers & Processing Society erawh chuan Isabella an siam bak chu hmun dangah an hralh lo thung.