ZALEN July 28, 2026: Mizoramin Goods & Services Tax (GST) a hman tirh, kum 2016-2017 a sum hmuh chu Rs. vaibelchhe 313.91 a ni a, kum 2025-2026 a sum hmuh chu Rs. vaibelchhe 1278.55 a tling a. Kum 10 chhunga GST atanga Mizoram sum hmuh thanna/punna hi a percentage a chhutin 307% a tling pha.

Press Information Bureau (PIB)-in tun hnaia ‘One Day Media Workshop on 12 years of Governance on Employment Generation & Economic Reforms under GST’ tih, Mystic Hills hotel, Chaltlang-a an buatsaih tuma Taxation department hotuten an tar lan danin India puma GST hman a nih hma chuan sawrkar laipui leh state-ten chhiah chi hrang hrang lain hei hian harsatna tam tak a siam a. Mahse, GST dan hman a nih hnu chuan check gate siam thinte tihbo niin bungraw kal vel pawh a chak a, chhiah hmuh pawh a pung tih an sawi.

GST chuan hna thar eng emaw zat a siam tih sawi bawkin Mizoram chhungah GST buaipuitu (practioner) mi 29 an awm a, India-ah ‘one nation, one tax, one market’ hman a ni tih an sawi bawk.

Tun hnai kum thum emaw kalta chhunga GST bikah Mizoram sum hmuh a tlakhniam chhan chu hmasawnna lian tham hnathawh a tlem vang niin Taxation department hotute chuan an sawi a. “Mizorama central scheme hnuaia hnathawh lian tham - rel kawng siam te, kawngpui laih hna te thawh zawh a ni tawh a. Hnathawh lai kha chuan heng hna thawktu contractor-te atangin sum tam tak tak hmuh thin a ni a; mahse, an zawh tawh avangin sum hmuh hi a tlem ta a. Hna lian thawh a awm leh chuan sum hmuh hi a pung leh tura ngaih a ni a, hmun dangah pawh chhiah hmuh hi a tlem chang a awm ve thin a ni,” an ti.

Taxation department thawktute chuan kan thil lei Rs. 200 chin chung lamah sumdawngten tax invoice an pe tur a ni a, Rs. 200 hnuai lam pawh nise thil leituin tax invoice a phut chuan an pe tur a ni tih an sawi a. “Tax invoice a awm loh chuan sumdawngten chhiah dik tak an chhung lut em tih hriat a har bakah an awl thei bawk a. Tax invoice pe chhuak lo hremna a awm a, pawisa chawi pawh a tam hle a. Nikum October khan hetiang ti lo an awm leh awm loh hma kan la a, cheng nuai chuang fe chawite pawh an awm a ni,” an ti.

A hma chuan bungruate kan state an luh dawnin endika chhinchhiah thin a ni a. Tunah erawh chhinchhiah a nih tawh loh avangin thil dik lo ti duh tan tih theih a ni an ti a. Online-a thil kan lei pawhin tax invoice hi tar lan zel a ni tih an sawi bawk.

GST atanga sum hmuh chu dan tlangpuiin fur laiin a tlem tih taxation department hotute chuan an sawi a, hei hi a chhan ber chu ruah sur vanga kawng a chhiat thin vang leh bungraw phur lirtheite an kal tam loh vang niin an sawi a. “A tlangpuiin fur lai hi chuan lirthei veivak an tlem thin a, hei vang hian bungrua a lut tha lovin chhiah hmuh pawh a tlem a. Mahse, rel kawngin Mizoram a pawh tak avang leh rel hmanga bungrua lut a tam tawh avangin sum hmuh hi a tlem lutuk lo turah kan ngai a ni,” an ti.

GST rate tihhniam chuan kawng hnihin nghawng a nei thei tih sawiin taxation hotute chuan, “Kawng lehlama ngaihtuah chuan rate hniam vangin sum lakluh a tlahniam tura ngaih a ni a. A lehlam zawnga ngaihtuah chuan thil man a tlawm chuan a leitu an tam ang a, thil hralh a tam na na na chuan sum lakluh pawh a pung tura ngaih a ni bawk a. Mahse, Mizoram chu mihring kan la tlem a, a leitu tur kan tlem avang hian a hlawkna hmuh tur erawh a tlem hle a ni,” an ti a. Lirthei atanga chhiah lak tihtlawm a nih hnuah a leitu an pung nia an hriat thu an sawi bawk.

GST hi July 1, 2017 atangin Mizoramah hman tan a ni a, nikum atang khan GST 2.0 pawh kalpui tan a ni a. Taxation department chuan sawrkar kum thar, April atanga June inkar chhung khan chhiah chi hrang hrang atangin Rs. 3,81,75,11,872 an hmu a. Taxation department sum hmuhte hi GST atangin Rs. 2,73,02,78,648, Profession tax atangin Rs. 1,78,07,082, Sales tax atangin Rs. 78,41,33,001, kawng siamna (road maintenance cess) Rs. 14,26,10,969, Social infrastructure & Services cess-ah Rs. 14,26,10,968 leh chhiah dang atangin Rs. 71,204 te an ni.