Haulawng khuaa entrepreneur hlawhtling tak pahnih, Ramdinmawia leh Chhuanmawia te chuan mipui mamawh (demand) pek sen loh thil an siam chhuak.
Ramdinmawia hian organic leitha siamin a thilsiam avang hian Planning department buatsaih Mizoram Kailawn inelna ah lawmman pakhatna lain Rs. nuai 4 a dawng a. Chhuanmawia hian Mizoram Science, Technology & Innovation Council (MISTIC) buatsaih Mizopa Technlogy hmanga inelna buatsaihah lawmman pakhatna dawng bawkin ani hian puantah khawl, la hlumna khawl, vawkchaw channa khawl, iron rod herhna leh mipuiin mamawh siam tura an duhte a siam thin a ni. Heng mi bik pahnihte hi Zalen palai chuan tlawhin an hnathawh dan leh an thilsiamte a en a, an pahnih hian zirna sang zir lem lo, tualchhuak thiamna talent nei ve ve an ni.
Ramdinmawia hian vawk leh ar damdawi bakah thil hrang hrang siamin tunah erawh chuan organic lamah a insawrbing tawh niin Zalen palai a hrilh a. Tunah hian leitihthatna hi a tui leh a phut siamin heng a thilsiamte hi Aizawl leh Lunglei lamah a hralh ber tih a sawi a. “Mizoram pawn Shillong atangin order kan hmu a, mahse Mizoram a hralh tur bak kan la siamchhuak thei lo a. Tunah hian Germany leh USA atang pawhin order ka dawng a; mahse, trade mark ka la neih loh avangin a theih loh a. Organic certified hi nei ila chuan tun aia tam zawk hi ka siam theih ka beisei a ni,” a ti.
Zalen zawhna chhangin Ramdinmawia (Tea) chuan a thilsiam leitu te chuan an leinawn leh zel niin a sawi a, an mamawh a pe hneh lo zawk niin a sawi a, a thilsiam chhuah atangin thla khatah chawhrualin Rs. 50,000-60,000 vel a lalut thin niin a sawi bawk.
Khawl siam thiam Chhuanmawia hian kum 2016 khan Mizoram Science, Technology & Innovation Council ten intihsiak an buatsaih ah lawmman pakhatna a dawng a, ani hian vawkchaw channa, buh/chhang denna, ring rod herhna, la hlumna, chhawhchhi hlumna leh siam tura an duh ang chu a siam thin a. Motor chabi bo pawh a siamsak thin a. Engtin nge a chabi hmu loa a chabi mil a siam theih tih Zalen zawhna chhangin, “A buaithlak thei khawp mai a, kan risk a, kan la risk fuh zel hrih,” tiin a chhang a. Ralkhata JCB chabi bo pawh a siamsak a ni. Chhuanmawia chuan hnathawh nei a nih avangin a duh angin thilsiamna hun a nei lo tih sawiin mipuiin order an neih erawh chuan a theih ang angin a hunawlah a siamsak mai thin niin a sawi bawk.