India ram state hrang hrangah grape chin a ni a, a bikin chhim lam state-ah an ching uar zual a. Heng state-te hian grape atangin wine tha tak tak an siam a, chung zinga lar ber pawl chu Sula wine an tih mai ‘Sula Vineyards’ a ni. Maharashtra-a Nashik huamchhunga an siam a, India rama wine hralhchhuah hnem ber leh wine award dawng hnem bera chhal ‘Sula Vineyards’ el tur hian Hnahlan chhuak Isabella an thlang.

Sula Vineyards wine hi India-ah chuan a larin an hralh nasa hle a, he wine elpui tur hian Hnahlan Grape Growers & Processing Cooperative Society siamchhuah, ‘Isabella’ chu New Delhi leh a chhevelah zawrh tum a ni.

New Delhi chhehvela Mizoram grape tharchhuah hralh leh zawrh a nih theih nan hian August 8, 2023 khan Hnahlan grape ching aiawh leh RR Sales, Delhi chuan thawhdunna thuthlung, MoU an ziak a. MoU hi kum nga chhung atan ziah phawt a ni a, kum thum hnuah ennawn leh tur a ni.

RR Sales hian July 28, 2023 khan Champhai winery atanga siam ‘Champwine’ leisak turin MoU an lo ziak tawh a. Hnahlan Winery-a Grape wine siamte chu a hralhna tur an zawnsak dawn a, August thla tawp emaw, September thla tir emaw hian NCR New Delhi-ah a tlangzarhna leh khuhhawnna an siam dawn niin Zalen an hrilh a ni. 

RR Sales neitute chuan Isabella leh Champwine chu siam danglam lovin a nihna ang angin an zuar dawn niin an sawi a. Winery pahnih atang hian an wine siamchhuahte chu leiin Delhi-ah excise duty an chawi dawn a, a phurhna senso leh chhiah chawi neuh neuhte paih a nih hnuah a man chu a hriat theih dawn chauh niin ZALEN an hrilh a. Champhai leh Hnahlan Winery atanga siam grape wine chu ram chhung hmun dang atanga wine siamte aiin a quality a hniam bik lo niin an sawi bawk.

RR Sales neitute chuan India rama ram dang siam wine man tlawm ber chu Rs. 1,200-te a ni tih sawiin Mizoram siam wine chu a that ve tho avangin hei aia tlawm zawk hian an hralh theih an beisei a. India chhim lam atanga siam, Sula wine chu an elpui ber tur nia an rin thu sawi bawkin a hralhna kawngah pawh Hnahlan leh Champhai winery-ten an mamawh ang zat an pek theih loh mai an hlauh zawk thu sawiin a hralhna lamah pawh theihtawp chhuah an tum tih Zalen an hrilh bawk.

Hnahlan leh a chhehvela grape huante hi horticulture department hnuaia MIDH atangin chei that tum mek a ni a. Tun dinhmunah Hnahlanah hian grape chinga eizawng chhungkaw 200 vel an awm a, grape tihlar nan hian August 19, 2023 hian grape festival neih tum a niin he hunah hian All India Wine Producers Association hruaitute pawh tel tura beisei an ni.