Tun hma deuh chuan khawchhak lamte awmpui atan Mizoram-ah  hman thin an ni a . Myanmar lam boruak a ziaawm hnuah awmpui nula (house maid)-te chu an ramah an haw chho a, Tripura leh khawthlang lam mite chu awmpui ber an ni zui rih. Mizoram nulate pawhin an dai zau ve zel a, India ram pawn thlengin hnathawkin an chhuak ta zel.

Mizo nulate hi khawchhak lam - Singapore, Macau, Malayasia leh Hongkong ah te an kal nasa hle a, heng zingah hian Singapore hi luh awlsam ber a nih avangin Mizo hmeichhe zingah hnathawka kal pawh an tam ber a. Singapore-a hnathawka awm tawh hmeichhe pakhat chuan, “Singapore-ah chuan dan hi a lalin an zawm tha a; chuvangin, harsatna tawk pawh kan tlem hle a. Kan visa pawh kum hnih chhung atan siam lawk a ni a, harsatna tawk an awm pawhin agency-te hnenah kan thlen zung zung thei a ni,” a ti.

Hetih lai hian Arab ram thenkhata Mizo hmeichhe hnathawk chuan harsatna an tawk a. UAE-a Mizote leh Mizoram BJP chuan heng harsatna tawkte chhanchhuak tur hian hma an la mek a. UAE khawpui, Dubai hmuna hnathawka awm Mizo pakhat chuan, “Mizoram atangin housemaid tur te, hna eng emaw thawk turin he lam agency nen inthurualin an rawn thawn a. Helai domestic worker-te hi chu sal (slave) ang vel an ni a, hrehawm an ti lutuk hi haw leh an duh a. Mahse, harsatna tam tak a awm a, hmeichhe thenkhat chuan sexual harashment an tawk bawk niin kan hria,” tiin ZALEN a hrilh.

Heng harsatna tawkte hian engtin tin emaw an thiante kal tlangin an rawn bepawp thin tih sawiin an nin Indian Consulate nen tangkawpin an bawhzui thin niin a sawi a. Heng hmeichhiate hi legal proceeding tih loh chuan va lak ngawt kha a theih loh niin a sawi bawk.

Dubai-a Mizo pakhat chuan UAE an rawn thlena employer kutah an awm tawh chuan mi mal anga inumzui a har tawh tih sawiin buaipui lai mek Mizo nula 13 vel an nei niin a sawi a. Mizorama recruitment agency te, a bik takin Gulf rama thawn thinte agency licence (sawrkar atanga phalna) nei nia insawite chu enfiah deuh ngai a ti a. Foreign recruitment agent-te hian Ministry of Overseas Indian Affairs hnuaia Protector of Emigrants hnenah registration an ti tur a ni a, registration fee Rs. 25,000 pein kum nga valid registration pek a ni thin an niin bank quarantee Rs nuai 50 neih a ngai tih a sawi bawk.