Tunhma atang tawhin khawvelah natna hri leng a awm thin a, thenkhat chu hun rei vak lo hnuah te a reh leh mai a. Natna hri leng nasa leh khawvel huapa leng, mi tam takin an thihpui rualin a ziaawm deuh te pawh an awm tho.

Tun hnai lawkah pawh khawvel huap hri leng eng emaw zat a awm a, chung zingah chuan Covid-19 kha thihna thlentu tam ber leh khawvelin a buaipui ber a ni awm e. Covid-19 a reh hnu lawk, tun hnai mai khan natna chi khat, ‘m-pox’ chu Africa atanga leng thar lehin he natna hi ram hrang hrangin an buaipui chho

Mpox hi monkeypox tia hriat thin a niin Mizoten ‘zawng hri (small pox)’ kan tih mai thin nen kha chuan dang mah se hemi chhungkua tho kha a ni a. He hri hi virus chi khat niin tun hnai khan Africa ramah a hri vei hi hmuh chhuah a ni a. Hriat theih chinah Africa ram bakah Pakistan, Sweden, Singapore leh Thailand ramah te hmuh a ni tawh a, heng ram bakah hi chuan hri vei finfiah an la awm lo a ni.

India ramah pawh he hri vei hi an la awm lo nia hriat a niin sawrkar laipui chuan fimkhur thilah khualzinte tan invenlawkna, ‘travel advisory’ a tichhuak tawh a. Hri lenna hmun atanga zin hawte chu khunghran an ni dawn a ni.

ZALEN zawhna chhangin Integrated Disease Surveillance Programme (IDSP) Mizorama State Nodal Officer Dr. Vanlalrengpuia Chinzah chuan m-pox lanchhuah dan chu khawsik, lu na, taksa bawl, taksa rawl, chau ngawih ngawih leh thal be puar te a ni tlangpui tih a sawi a. He natna laka inven dan chungchang sawiin, “Covid-19 nen khan he natna hi a inang hle a. Mi thawk khum theiha awm loh te, he natna vei thil khawih hnu kut tifai lova khawih hnuaa hnar leh ka khawih te, he natna vei sa hel ei leh sex atang te in a inkai theih a ni,” a ti.

M-pox natna lak fihlim tur hian fai taka sabon nena kut sil, sanitizer hman leh mi dang hnaiha awm loh a tha a. Ran vulhte pawhin an pu darh thei bawk a ni.

Doctor thiamte sawi danin m-pox hi natna hlauhawm tak a ni lo a, chutih rualin fimkhur erawh a pawimawh thung a. He natna kai zinga 3-6% ten an thihpui thei a, a bikin naupang leh kum upa lamah thihpui an tam zual a ni.

M-pox natna laka Mizoram a fihlim theihnan leh he natna hian Mizoram pawh lo thleng se lo do let dan turah sawrkar chuan ruahmanna chi hrang hrang a siam a, mipuite tan chiaina tur a awm lo tih an sawi.

Sawrkar laipui pawhin ruahmanna hrang hrang a siam tawh a, India ram thiamnate a san zel avangin hlauh lutuk tur a awm lo niin mi thiamte chuan an sawi.

M-pox natna hi natna thar a ni lo a, kum 2022 pawh khan India ramah pawh he natna vei hi an awm tawh a, enkawl dam vek an ni.