Kum bul tan nan kum thara kar thar hmasa berah Urban development & Poverty Alleviation (UD&PA) chuan Mizoram khawpui ber Aizawl luhka pawimawh, Airport road, Phunchawng to Bawngkawn inkar kawng tihfai hnatlang, ‘UD&PA Department Faina Hnatlangpui’ an tih chu Zirtawpni khan an huaihawt a, helai kawngpui hi hmun 30 chuangah inthendarhin pawl hrang hrangin an huam chin zel tihfai hnatlang an nei. Mizoram khual thaten khawpui ber an luhna kawng chu fai leh thianghlim, khawpui luh chakawm khawp a nih theihna tura chei bawl an tum a ni.

He hunah hian khuallian mai bakah thusawitu hrang hrangten khawpui fai Mizoram hmun tina kan neih theihna tura hmalakna hrang hrangte an sawi hlawm a, India sawrkar laipuiin Swattch Bharat hmanga ram a lo thianghlim theihna tura an hmalakna hrang hrang te tarlan niin, mipuiin kan tih ve tur tam tak a awm thu an sawi hlawm

‘ODF State’ kan ni mek chu state fai ber pawl leh ‘Open Defecation Free Plus State’ nih tum a nih thu he huna khuallian Deputy Chief Minister Tawnluia chuan a sawi a, faina kawngah hlawhtling tur chuan a bul tanna chu chhungkuaah a ni h thu a sawi bawk, sawrkarin sum tak senga hma a lakna a puitlin theihna chu mimal tin te kan nih thu a sawi lang.

Sawi lan ang hian tun hnaiah bawlhhlawh paih dan pawh kan uluk sawt hle a, kan bawlhhlawhte hi tunah hi chuan kan paih a ni tawh lo a, kan senghawi a ni mah tawh zawk a, bawlhhlawh paiha kan paih hi leitha siam nan te leh hralh sum chang thei atante sawngbawl zuai an ni ta bawk a, chumi awmzia chu kan duh loh tam tak kan dahkhawm hian sawrkar tan pawh sum lakluhna tha tak a ni tihna a ni a, nakinah phei chuan kan bawlhhlawh te hi sum hnar atana kan la hmang letling thei a, bawlhhlawh kan paih kan fimkhur hian kan leilung pawh thui takin kan veng tihna a ni bawk.

Aizawl khawpui chhunga bawlhhlawh lakkhawm hi nitin Kg nuai 1.35 a tling deuh ziah a chhut a ni a. Tunah hian AMC chuan bawlhhlawh la khawm turin Lirthei laihawl (MMV) 78 chuang leh Lirthei lian chi (HMV) 78 chuang ni tin a hmang thin a. Bawlhhlawh senghawi nan hian kum khatah Cheng vaibelchhe 6 chuang senso anga chhut a ni hial a; chuvangin, kan bawlhhlawh avanga sum tam tak sawrkarin a sen phuhruk nan hian mipui lam hian tih tur pawimawh tak kan nei tih hi mitinin kan chian a ngai a ni.