Hun engemaw chen kalta atang khan Mizote hian Isua piancham Krismas hi kan nghakhlel hle a, kan nghahhlelh chhan pakhat pawh thawmhnaw thar kan neih thin vang a ni a. Sumdawngte pawhin he hunpui lo thleng hi nghakhlel takin an thlir thin a, a chhan chu he hunpui denchhen hian an thawmhnaw te an hralh nasat thin vang a ni. Hetih lai hian kum kalta 2023 Krismas erawh Aizawl a sumdawng te chuan an beisei angin an thawmhnaw an hralh lo thung.

Mizorama sumdawnna hmun lian leh hlun ber Aizawl New Market a dawr hrang hrang te chuan hunpui vuakvetah inhralh nual mahse an beisei an pha lo niin ZALEN an hrilh. Thawmhnaw dawr neitu nu pakhat chuan, "Mipui veivak chu an tam a, kan dawra lo lut pawh an tam. Mahse thil lei lova chhuak leh an tam a, kan beisei ang chuan kan inhralh tha lo hle," a ti. Pheikhawk dawr nghaktu pa pakhat pawhin, "Ni dang ngaihtuah chuan krismas vuakvetah chuan kan inhralh tam ngei mai a. Mahse mipui veivak an tam ngaihtuah chuan kan in hralh tha lo deuhah kan ngai a. Kan hralh tlem chhan hi ka hrethiam chiah lo na in hmun hrang hranga dawr a tam tak vang niah ka ngai," tiin a sawi bawk.

Aizawla sumdawnna hmunpui pakhat, Millennium Centre a dawrkar te pawhin an thilzawrh an hralh tlem niin an sawi. MC a dawr neitu pakhat chuan, "Millennium Centre hi a tlangpuiin hmeichhe thawmhnaw zawrhna a ni a. Kan bungruate hi China atanga kan lak a niin Myanmar tualchhung buaina avangin kan bungruate hi kawng lakah tangin a lo thleng thei lova. Hei vang hian dawr tam tak chuan thawmhnaw zawrh tur kan nei lova, a nei chhun India thawmhnaw zuar te erawh chuan an hralh tha thaw khat chuan kan hria," tiin ZALEN a hrilh. Mi tam takin online hmanga thawmhnaw an chah thin chu an chhiatpui leh chhiatpui loh zawhna chhangin, "Kan tawrhna chen chu a awm mai thei a. Mahse online a an thilzawrh leh kan dawra kan thilzawrh hi a inang lo a. Quality chungchangah pawh kan neih that zawk avangin min nghawng lutuk lo ah kan ngai a ni," a ti bawk.

Aizawl New Market enkawltu te chuan Krismas vuakvetah hian kum dang ang thovin bazar a tawt a, sumdawngte pawh an inhralh tha thaw khat nia an hriat thu ZALEN an hrilh a. Krismas vuakvetah thil bo report a awm nual nia sawi bawkin, "Purse leh wallet bo a awm nual a, a tam ber hi rukru 'pick pocket' te lak niin kan hria a. Thil bo hi hmuh let a harsa em em a, purse leh wallet kan hmuh let te pawh a chhunga pawisa chu a bo vek zel a ni," an ti a. Rukru te chu an thiam em avangin man an harsa hle niin an sawi bawk.