Mizorama Non-Government Association (NGO) zingah YMA chuan member a ngah ber piah lamah Branch pawh a ngah ber a, chutihlaiin hlawh neia mi chhawr hnem ber chu Mizo Hmeichhe Insuihkhawm Pawl (MHIP) an ni thung, anni hian YMA-in hlawh neia a chhawr let hlawh neia chhawr an nei a ni. Sum lakluh kawngah Chakma thalai lakluh a sang viau.

    Statistical Handbook, Mizoram 2020, kum 2021-a tihchhuah in a tarlan 
danin, YMA chuan thawktu hlawh an pek, paid worker 21 an neih laiin MHIP chuan 
hlawh neiin mi 45 zet an chhawr. YMA hian nuai 230 chuang an lak luh laiin MHIP hi 
chuan nuai 54 chuang hret an lalut thung. YMA hian hemi kum hian member nuai 
4,46,623 an neih laiin MHIP hian mi 2,88,210 an nei ve bawk. 

    MUP chuan hlawh neia chhawr mi pasarih an nei a, anni chhawr zat chiah 
hi Young Chakma Association (YCA) chuan hlawh neiin mi an chhawr. Young Lai 
Association (YLA) leh Mara Chano Py (MCHP) chuan mi pathum ve ve an chhawr. 
Lai Women Association (LWA) chu heng pawl zinga hlawh neia chhawr nei lo 
awmchhun an ni.

    Sum lakluh kawngah YMA, MHIP leh MUP te chu lalut hnem pathum an ni 
a, an dawt chiaha awm chu Chakma thalai pawl (YCA) te bawk an ni, nuai 15 chuang 
an lalut a, pangana LWA ten nuai 9 chuan an lalut. YLA leh MTP ten nuai 3 ve ve lalut 
anga tarlan a ni.

     Young Chakma Association chu YMA, MHIP leh MUP tih lova branch/unit 
ngah ber an ni bawk a, member ngah lamah pawh pangana an hauh pha a, Mara 
Thalai pawl/Mara Thyutlya Py (MTP)-in an pha lo. YMA chu member nei ngah ber 
niin, MHIP chuan an dawt a, Mizoram Upa Pawl (MUP) chu pathumna an ni a, Young 
Lai Association (YLA) chu member ngah palina an ni. Mara Chano Py (MCHP) leh 
Lai Women Association (LWA) te chu member lamah an inzat tawk. YMA leh MUP 
hian a hranpain hmeichhia leh mipa zat thliarna an nei lo, YLA leh YCA-ah hian 
hmeichhia aiin mipa member an tam zawk a, chutih laiin MTP-ah chuan mipa aiin 
hmeichhe member an tam zawk thung.