Hmun hrang hrangah hnama harh tharna, Nationalism a piang chho zel a, Nationalism piang hian a chang chuan buaina lian tak a thlen a, a chang erawh chuan hmun hrang hranga khawsa hnam hrang hrangte a huikhawmin inunauna tha zawk a thlen thin. Nationalism thli hian Mizo hnam pawh a nuai ve a, tun hnai maiah pawh Thangram Indigenous People’s Movement chuan Mizoram state-a awm an duh tih ualau takin an puang.

Thangram Indigenous People’s Movement hruaitute chuan Mizo an ni tih sawiin an awmna apiang chu Mizoram a ni tih chu an pawm dan a ni tih an sawi bawk. Thangram Indigenous People’s Movement hi tunah chuan Assam ram chhung, Karimganj district-ah a awm hrih a. Mahse, Assam sawrkar chuan a ngaihsak lo nia hriain an unaute khawsakna Mizoramah awm an duh a, tun kar chho hian Prime Minister leh Union Home Minister te hmuh a, an duhna memorundum hi thehluh an tum a ni.

Thangram Indigenous People’s Movement President K. Vana Chorei chuan, “Tuna kan awmnaah hian kum 300 vel kan awm tawh chungin Assam-ah kan inpawm thei lo va, kan awmna hi Mizoram chhungah kan pawm tlat a; chuvangin, Mizoram state-a awm hi kan duh dan ber a ni,” a ti. K. Vana Chorei chuan 180 square km chhungah khawsain Mizo khua 24 an awm tih a sawi a, Thangram Indigenous People’s Movement huam chhungah hian Mizo hnam hrang hrang paruk - Chorei, Hrangkhawl, Ranglong, Sakechep, Kaipeng leh Mualsom te an awm niin a sawi bawk a. “Mizoram bak hi belh tur kan nei lova, khulai ram khu chhanchhuah vat a nih loh chuan a ral mai ang tih kan hlau a ni,” a ti.

MZP President B.Vanlaltana chuan Thangram Indigenous People’s Movement te chu state pawna Mizo awm zingah Mizorama lut tura hma la hmasa ber niin a sawi.

“Thangram Indigenous People’s Movement-te hi Singla Forest Reserve huam chhung 180 sq.km huam chhungah an khawsa a. Mizoram hi an tan chuan an Jerusalem a nih avangin Mizorama rin luh leh awm hi an duh a ni,” tiin a sawi.

MJA President Zonunsanga Khiangte pawhin chanchinbumite chuan Mizo hnam peng hrang hrangte inunauna an ngai pawimawh tih sawiin, “Hmun hrang hrangah awm mah ila kan rilru chu hmun khatah a awm a, nasa lehzuala kan intlawhpawh a ngai a ni,” a ti bawk.