Covid leng avanga rei tak kan inkhuahkhirh a, mi tam tak sum lakluh a tlakhniam phah hle, mipui kan zalen leh hnuah Pathianni-ah mi an chhuak nasa a, chutihrualin kawngsira Pathianni a inzuar pawh veng tinah an pung.

ZALEN-in traffic duty pakhat a zawh pawhin mihring chhuak an tam thu a sawi a, ani erawh hi chuan khawpui tlangdungah tak chuan a hma aia inzuar an tam phah chuan a hriat loh thu a sawi a, veng hmawr lamah chuan an awm phah theia a hriat thu leh khawpui chhuahsana vak chhuak an tam avangin thil ni thei nia a hriat thu a sawi.

Veng pakhata dawr siam thin chuan tun hma lama siam an nih loh thu a sawi a, Covid hnuah an sum lakluhna an duh beelh avanga ti mai thin a nih thu a sawi a, ni tina inhlawh chawpa eizawng an nih avangin Pathiannia sum hmuh belhna chu atan sum lakluhna tha tak a nih thu a sawi a, a zawngchhang rih thu a sawi bawk.

Dawr siam pakhat chuan ni tina ei tur siam thin an ni a, Pathianni hian mi tak takin thil ei tur an beisei thin vangin Pathianniah pawh siam chhunzawm ta mai niin a sawi a, a lehlamah Sunday-a inzawrh erawh nuam a tih vak lo thu a sawi thung a, sum lam thlir chuan tha a tih thu a sawi tel hram.

Dawr siam chungchangah veng pakhata inkhawm bang pakhat ZALEN-in a zawh chuan Pathiannia dawr inhawng an tam chhan a ngaihdan a sawinaah, lockdown avanga inkhawm thei lova  kan awm rei lutuk avangin Pathianni kan serhna a tlakhniam vang nia a ngaih thu a sawi ve mauh thung.

Lehkhabu order sema veng hrang hranga kal thin, delivery boy chuan tun hma lamah hetiang ei tur zuar an tam a hriat ngai loh thu a sawi a, a kalna vengah kawng kama thil ei mai tur hmuh tur a tam hle tih ZALEN a hrilh a, ani hi chuan Covid vanga sum harsatna vangin a thlen niin a ngai ve thung.

Heng thil zuarte hian chana, chow, rice leh pakora lam chi an zuar tlangpui a, Vaipa Mix kan tih ang chi zuar an awm thin bawk.