Chaw tha leh hrisel ei inzirtir uar thla, Rastriya Poshan Maah (National Nutrition Month) 2023 chu hman mek a niin September thla chhunga kalpui tur a ni a. Kum 2018 atangin Poshan Maah hi kalpui tan niin kumin hi India rama tum ruk hmanna a ni a, kumin thupui atan hian ‘Suposhit Bharat, Sakshar Bharat, Sashakt Bharat - Well-Nourish India, Literate India, Strong India (Chaw tha leh zirna tha nena thuam chak India)’ tih hman a ni.

Poshan Maah (Nutrition Month) hi Ministry of Women & Child Development hnuaia nutrition mission lian tak, Poshan Abhyiaan hmalakna zinga program pawimawh tak niin kum 2018 atang khan kum tin India ram hmun hrang hrangah September thla chhungin hman thin a ni a. Kumin bikah chuan thupui zulzui hian hmalak dan tur hrang hrang pasarih - hnute tui leh chaw tha dang hmanga naute chawm len, naupang hriselna kawnga intlansiak, ei tur tha leh zirna kalkawptir, nunphung dik leh tha hmanga hriselna neih, ram leh hnam hmangaihna kawnga inzirtirna, ei tur tha atana tual chhung thar chhuah ngei hman leh ei chhiat avanga thisen tlakchhamna tireh tura hmalaknate kaltlangin inzirtirna neih te an ni.

Poshan Maah kaltlang hian Poshan Abhyiaan thil tum hrang hrang naupang kum ruk hnuai lam thanthu ven, an kum leh an rih zawng inmil lo lutukte, an san zawng leh an rih zawng inmil lo lutukte nuaibo tum a ni a, hmeichhe tleirawl leh nu hote zinga thisen tlakchhamna anaemia awm thin tihhniam leh nau piang hlim buk zang lutuk awm thin tihhniam tumin mipui vantlangah a zau thei ang bera zirtirna leh inhrilhriatnate neih thin a ni.

ZALEN zawhna chhangin Social Welfare & Tribal Affairs thawktute chuan Poshan Maah hnuaia hmalakna avangin Mizoram naupiang zingah hlamzuih a thi an tlem sawt hle tih an sawi a. Naupang thi an tlem avang leh an thawh that vang hian Mizoram chuan lawmman pawh a lo dawng tawh thin tih an sawi a. Poshan Maah hnuaiah hian nu leh naupangte hriselna tha neih tir chu an tum ber a ni tih sawiin chaw tha ei loten an lo ei theih dan tur leh hriselna kawnga hma an sawn nan hma an la thin niin an sawi. 

Social Welfare & Tribal Affairs department thawkte chuan nausen chu thla ruk a tlin hma chuan nu hnute chauh ring se an duh tih an sawi a. Thal 6 a tlin hnuah chuan thlai leh thei chi hrang hrang ei tel se. Chutiang bawkin nu te pawhin thei leh thlai hi ei tam ber an duh tih an sawi bawk.