HIV positive a ni a, matric chiah a pass a, pianpui thiamna a nei em em lo. Mahse a tumruhna chu amah chawisangtu niin hnehtu a lo ni ta a, mahni mahin a tawrhlaiin mi za tam tak tan malsawmna a ni thei tlat a. Midang tana a nun a pek theihna thinlung chu Chunglamin chhinchhiah ni maw! Confederation of Indian Industries (CII) Foundation in Mizo hmeichhe zinga chawimawina a pek hmasak ber a ni ta hial a- India ram pum huapa midangte hriselna leh nunkawng sialpuina lama chawimawina Women Examplar Award 2019 chu Vanlalruati, President, PWNM hnenah chuan hlan a lo ni ta hial a ni.
2005 khan Ruati hi nasa takin a damloa, chutah chuan HIV a pai tih an hrechhuak a, beidawnna khur thuk takah a lut a ni, hetih rual hian a nun chu her danglam tumin nasa takin rilru a siam bawk a ni. 'Ruati counseling pe tura ka va luhchilh chu vawiin thleng hian ka mitthlaah a la cham reng thin a, khatiang anga taksa chhia HIV vei ka counsel tawh zingah an la awm ngai lo, a lu atanga a ke ler thleng hian phuhlip hraw pui pui hian a tuam vek a, a thi mai dawn hian ka hre hial a- chu chu bul kan tanna chu a ni,' tiin counselor enkawltu chuan a sawi bawk.
Ramhlun Venglai Kohhran in camping an nei a, chutah chuan khawsik taksa chaklo takin Ruati chu lutin a paltlang ve zak a. 'Ka positive tih ka hriat khan ka rilru ka siamfel tawh a. Ramhlun Venglai Kohhran Hmeichhiate hian min thlahthlam loa, min thinhrik loa, chanvote min pe a chu chuan nasa takin min ti puitling a ni,' tiin Ruati chuan Kohhran pawimawhna a sawichhuak a ni.
Midang tana malsawmna nih a duhna chuan Ruati rilru chu a hneh hle a, Mizoram People Living With AIDS (MPLAS) chu zawm ve chawtin outreach worker in bul a tan a, ART damdawi an lak theih nan mi tam tak centre a hruai thleng thin a ni. Mi tam takin HIV an kai a ni tih an zep laiin inthinhrikna a reh theih nan ani chuan a puang chhuak ta fo mai a, rawngbawlna zau zawk rah chhoh zel a duh ta bawk a ni.
HIV positive te'n an damdawi ART tha zawka an hmuh theih nan theihtawpin hma a la a. HIV veite chuan ART la turin Aizawl an lo kal a ngai thin a, thlenaah harsatna lian tak an tawh thin vangin an riahna tura a sual chhuah Short Stay Home chu mi tam takin an chhawr tangkai a, inthinhrikna a len avangin Aizawl veng hmawr zawkah sawn a ngai ta hial a, tunah phei chuan a tawp ta hial a ni.
Ruati hian thiamthil nei lo mah se, a thiante nawrkal erawh a thiam ngang a ni ang, People Living with AIDS ho tan Lunglei ah hmun khuarin 2013 khan Project Coordinator in a awm tana, kum 3 a awm nghe nghe a ni. HIV/AIDS leh Drugs addiction a lo hniam theih nana a tha thawh hi hlawk tak mai a ni a, positive te tan a treatment pawimawh zia a tak nunpuitu a nih avangin amah anga lo beidawng thin te dinhmun thinlung taka a hriat thiampuina chu a 'advantage' a ni ta zawk a ni. Nu HIV positive te'n an fa te an kai lohna turin nasa takin a campaign-a, amah ngeiin treatment a lak avanga a fapa a him thu te chuan ama dinhmuna ding ve mek te rilru a hneh thin hle a ni.
Positive women Network of Mizoram (PWNM) chu 2016 khan an din ta rawih a, Vice President te an ni ren rawn a. A thawnthu erawh a la intan dawn chauh a ni. An hmalaknaah hian hun manganthlak leh beidawnna tur khawp tam tak a paltlang a ngai a,tunah erawh chuan Positive Women Network (PWNM) hian HIV positive 3800 enkawl lai neiin, in register kher lo pawh HIV positive tawh phawt chuan treatment an lak theihna atan hma an la mek a ni. Sawrkar scheme hrang hrang – Healthcare, Housing, Skill building, AAY leh scheme dang te chu a hmeichhiatpui harsatna tawkte'n an chhawr tangkai theih nan te hmalak a ni a, counselling te neiin thinhrikna leh endawngna a reh theih nan an fehchhuak mawlh mawlh a ni ber a, tunah phei chuan MSACS nen tangkawpin ART damdawi te an pe chhuak tawh a ni.
PWNM Office hi Tuikhuahtlang ah Dr. C. Silvera Building, 2nd Floor ah awmin a mamawh tute tan chuan pan theih reng an ni a. Kohhran nu ho bawk an tangkai hle! Bethlehem Veng Presbyterian Kohhran Hmeichhia leh Khatla Presbyterian Kohhran hmeichhia te'n staff pakhat ve ve (HIV positive) an rawih sak mek a. Mission Veng Presbyterian Kohhran Hmeichhia te'n staff nurse hlawh an rawn tum sak bawk a ni.