Mizorama office leh hmun pawimawh te venghim turin police leh force dang te rawih an ni thin a. Mizorama force-te rawih an nih lai hun eng emaw chen kalta atang khan phai lamah erawh private security ruaiin hmun pawimawh te an ventir thin. Mizoramah pawh kum 15 kalta vel atang khan private security hi bultan a niin mi tam takin an hmang tangkai hle.

Mizorama private security bultantu (?) nia hriat, JC Security chuan kum 2007 atang khan bultanin hmun hrang hrangah an mi leh sa hnathawkin an chhawr mek.

JC Security neitute chuan an naute hi training pein hmun hrang hrangah an duty-tir thin tih an sawi a. Private security agency chu Mizoramah pawh an awm ve nual tawh tih sawiin mipui mamawh zawng zawng chu phuhru thei lo mah se, an mamawh zual chu an phuhru thei nia an hriat thu ZALEN an hrilh.

Aizawl Dawrpui veng chuan security atan hian mi pali an ruai mek a, heng mite hi nileng zankhua (24 hours) an duty thin a ni a. Dawrpui khawtlang hruaitu pakhat sawi danin Local Council, YMA, MHIP leh MUP tangkawp chuan thla khata Rs. 7,500 hlawh in mi pali an ruai niin a sawi a. An hlawh bakah an ei leh inah Rs. 8,000 pein ni tin an tiffin manah Rs. 50 an pe thin niin a sawi bawk. 

Security-te chu an tangkaipui hle nia sawiin, “Kan security chhawrte hian an riahchilh a. A remchan angin veng chhungah an kal kual thin a, dawr rawk leh sualna chi hrang hrang lakah pawh kan ziaawm phah hle niin kan hria a ni,” tiin Dawrpui YMA hruaitu pakhat chuan a sawi bawk.

Private security chhawrtu hostel siam nu pakhat pawhin tha a tih thu sawiin, “Mi pakhat chauh kan ruai chungin kan tangkaipui hle a. Zankhuain an duty a, a changin room hrang hrangte an fang kual a. Rukru leh mi sual lakah kan him phah hle a, chhungkaw hrang hrangte hian sum hi thawhkhawmin chhawr ila chuan mi sual lakah pawh kan ziaawm phah ngei ka ring a ni,” tiin ZAlEN a hrilh bawk.