July 2, 2019-a Rakhine/Zakhine raltlan Hmawngbuchhuah atanga Myanmar a thawnkir te chu Mizoram an lo luh tawhloh nan Assam Rifles ten uluk takin Indo-Myanmar ramri an veng nghal niin Zalen chuan thu a dawng.

Zakhine raltlan thawnkirte hi chhungkaw 54-a mihring 219 an ni a; mahse, thawnkir dawn hian mipa puitlingte chu an awmna chin hriat lohin an tlanbo a, nunau la awm ang angte chu sipai leh district thuneituten Myanmar rama motor kal theihna tawp, Laitlang thlengin motor-in an bungrua an phur a, Laitlang atang hian Varang thleng (ke a kal ngai)-ah an thlen leh a, India sipaite hian ni 15 chhunga an ei tur chi hrang hrang - tel, dal,buhfai, chini leh thil dangte an pe a ni.

Myanmar Army leh Arakan Army te inkahna avanga Mizoram-a rawn raltlante hi India sawrkar-a Home Ministry chuan thawnkir tura State sawrkar a hriattir angin June 15, 2019 leh June 25, 2019 khan thawnkir tura ruahmanna siam a lo ni tawh a. Amaherawhchu, heng hunah hian khua in a zirloh avang leh inbiakpawhna kawnga harsatna a awm avangin thawnkir theih an ni lo a. July 2, 2019 khan India leh Myanmar sipaite inremna angin thawnkir an ni a, Myanmar sipaite hian ramri khua, Varang-ah lo dawngsawng tur an nih laiin an awm lo a, hei mai ni lovin Myanmar sipaite hian raltlan te phur tur lawng an tirh duh loh bakah Varang khuaa lawng nei zawng zawng chu tumah chhuak lo turin an vau nia hriat a ni.

Rakhine hnam hian hel Arakan Army an nei a, kum 2017 kum tawp lam khan Varang bul vela Rakhine helho inkulhna chhu chhe turin Myanmar sipaiten beihpui an thlak a. He inbeihna avang hian Varang atanga Mizoram lam kalpawh awlsam, Laitlang, T. Dumzau, Dumzau leh Zochachhuah-ah te Rakhine mi, nunau, pitar putar telin mi 2000 bawr vel chuan an sahimna zawngin Mizoram an rawn lut a. Central Young Lai Association (CYLA) leh tlawmngai pawl dangten raltlante hi ei tur leh intur mai bakah silhfen leh mutbu thlengin an pe a ni.

Myanmar sipai leh AA te boruak a ziaawm hnu hian raltlan tam tak chuan Myanmar hi an pan leh a, hetih lai hian Hmawngbuchhuah a awm Rakhine raltlan te hi chuan let an tum lo a. Myanmar an let leh chuan an hrehawm dawn nia sawiin Mizoram a cham/awm hlen dan an ngaihtuah a.

LADC a Village Council inthlan hnuhnung berah khan mi thenkhat chu electoral roll-ah inthuna, inthlan hi chuh ve tum an awm avangin ngaimawh an hlawh hle a ni.

Hei mai hi ni lovin raltlan nu leh pate chuan an fate chu Mizo school-ah kaltir phal lovin Buddhist puithiam leh anmahni zinga lehkha zir sang te nen school hran dinin, Kawl tawngin school an kal tir a. Hmawngbuchhuah khuaa SSA school chu luah miah lohin a awm a. Mizo school a an fate kaltir chu Kristian a inlehtir tumna-ah ngaiin an kaltir duh loh avangin LADC leh tlawmngai pawl lian ber CYLA pawhin an ngaimawh hle a ni. Tuna raltlan let duh lo te hi AA zinga tel an nih rinna a lian hle.